Ձեր վստահելի աղբյուրը

ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելն այսօր տարածել է հայտարարություն՝ ողջունելով հոկտեմբերի 18-ին ժամը 00։00-ի հրադադարի վերաբերյալ պայմանավորվածությունը, որը ձեռք է բերվել Ֆրանսիայի նախագահ Էմանուել Մակրոնի ջանքներով ու ԵԱՀԿ Մինսկի խմբի համակարգմամբ։

Տարածած հայտարարության մեջ նա ցավ է հայտնել, որ չնայած դրան՝ բռնությունները ջարունակվում են, հաղորդվում է ԼՂ-ում ու դրա շուրջ մարտերի մասին։ 

«Դա հանգեցնում է ավելի շատ քաղաքացիական տառապանքների։ Այն խորացնում է պետությունների ու հասարակության մեջ առկա հակամարտությունը, ու վերքի ապաքինումը դարձնում էլ ավելի բարդ։ Լեռնային Ղարաբաղի ժողովուրդն արդեն անցել է ծանր տառապանքների միջով։ Հակամարտությունը հանգեցրել է մեծ թվով, անընդունելի քաղաքացիական զոհերի: ԵՄ-ն խստորեն դատապարտում է բոլոր նման հարձակումները `անկախ դրանց ծագումից»,-նշել է Բորելն իր հայտարարության մեջ։

Նա նշել է, որ այսօր հեռախոսազրույցներ է  ունեցել երկու երկրների ԱԳ նախարարների հետ՝ ընդգծել, որ երկու կողմերն առանց նախապայմանների պետք է հարգեն հրադադարը։

«Ես նաև ընդգծել եմ, որ քաղաքացիների նկատմամբ հարձակումները պետք է անհապաղ դադարեցվեն։ Դրանք չեն կարող արադարացվել։ Ես կրկնեցի, որ ԵՄ-ն պատրաստ է օգնել կողմերին և ԵԱՀԿ-ին հակամարտության երկարատև լուծման գործում։ ԵՄ-ն կշարունակի իրավիճակի դիտարկումը»,,-ասված է հայտարարության մեջ։

Հիշեցնենք, որ Ժ. Բորելի հետ հեռախոսազրույցում Հայաստանի ԱԳ նախարար Զոհրաբ Մնացականյանը, անդրադառնալով Լեռնային Ղարաբաղի հակամարտության գոտում հոկտեմբերի 17-ին մարդասիրական զինադադարի հաստատման շուրջ պայմանավորվածությանը և դրան հաջորդած իրավիճակին,  հայտնեկ է, որ Ադրբեջանը, հերթական անգամ ի ցույց դնելով իր ուխտադրուժ կեցվածքը և խախտելով ձեռքբերված պայմանավորվածությունը, չի հրաժարվում Արցախի դեմ ռազմական ագրեսիան դադարեցնելու և հիմնախնդիրը ռազմական ճանապարհով լուծելու մարտավարությունից: