Ձեր վստահելի աղբյուրը

«Փաստենք, որ հերթական անգամ Ադրբեջանը չպահպանեց հրադադարի պայմանավորվածությունը, որն այս անգամ առաջարկել էր ֆրանսիական կողմը»,-պաշտպանության նախարարության ներկայացուցիչ Արծրուն Հովհաննիսյանն այսպես սկսեց ամենօրյա ճեպազրույցը  միասնական տեղեկատվական կենտրոնում՝ ներկայացնելով ռազմաճակատում օրվա ընթացքում տեղի ունեցած իրադարձությունները։

Նա մանրամասնեց՝ դեռ վաղ առավոտից շարունակվեցին մարտական գործողությունները նույն ուղղություններով։

«Սկզբից հյուսիսային կողմում հերթական հարձակման փորձ կատարեցին, ջախջախվեցին, հետ շպրտվեցին՝ որևէ նշանակլի հաջողություն չունենալով։ Նույն ժամանակ հարավում՝ օպերացիոն ընդհանուր ուղղությամբ երկու առանձին հատվածներում փորձել են հարձակողական գործողություններ ծավալել։ Մեկ ուղղությամբ ընկել են հայկական զինված ուժերի հրետանու հուժկու կրակի տակ, փախուստի են դիմել՝ կորցնելով զգալի թվով տեխնիկա, նաև մեծաքանակ զինամթերք, ինչի մասին մենք նշել ենք ցերեկը հրապարակված տեսանյութում»,-հայտարարեց Ա. Հովհաննիսյանը։

Նա նշեց, որ այլ ուղղություններով էլ  հարձակողական գործողություններ են եղել, համառ մարտեր են ընթացել։

«Դրանց արդյունքում հակառակորդը որոշակի տեղաշարժեր ունի, որոնց մասին շատ են բարձրաձայնում, դուք տեսնում եք։ Բայց կանխավ ասեմ, որ այս պատերազմում, որտեղ չափազանց ուժգին, սաստիկ ու կրակային մեծ խտություն պարունակող մարտական գործողություններ են իրականացվում, առանձին բնագծերի, հորինված կամ իրական նշաձողերով արտահայտված տեղանքների անուններով, բարձրունքներով առաջնորդվելն ու հաջողություններ ֆիքսելն ընդհանրապես ակտուալ չէ»,-ասաց նախարարության ներկայացուցիչը։

Բանախոսն ընդգծեց՝ ընթանում է հինգերորդ սերնդի պատերազմ՝ բարձր տեխնոլոգիական միջոցներով, մանևրային խմբերով, և ստատիկ բնագծերի պահպանման համար առանձին մարտական գործողություններ չեն վարվում։

«Դրա համար կոնկրետ բնագծեր, հաջողություններ ու նահանջներ չենք նշելու, ինչը մի քանի անգամ ես արդեն ասել եմ»,-ասաց Հովհաննիսյանը։

Նրա խոսքով, այսօր Ադրբեջանը կիրառել է օդային հարձակման տարբեր միջոցներ, այդ թվում անօդաչու թռչող սարքեր։

«Այսօր ժամըը 20։30-ի դրությամբ հայկական կողմը խոցել է 9 ԱԹՍ, որից երկուսը՝ Հայաստանի Հանրապետության տարածքում։ Այս պահին էլ մարտական գործողությունները շարունակվում են։ Շարունակում է թեժ մնալ հարավային ուղղությունը։ Լրացուցիչ տեղակությունները կներկայացնենք»,-նշեց նախարարության ներկայացուցիչը։