Ձեր վստահելի աղբյուրը

Ադրբեջանի ու Թուրքիայի կողմից սանձազերծած պատերազմի հետևանքները սեփական աչքերով տեսնելու համար Արցախի Հանրապետություն են այցելել Գերմանիայի Բունդեսթագի մի քանի պատգամավորներ։

Ստեփանակերտում լրագրողների հետ հանդիպմանը ընդդիմադիր քաղաքական ուժի` «Այլընտրանք Գերմանիայի համար»  կուսակցության ներկայացուցիչները դժգոհեցին՝ «գերմանական ԶԼՄ-ները պատշաճ ու արդար չեն լուսաբանում Լեռնային Ղարաբաղում կատարվող իրադարձությունները»։

«Այդ պատճառով շատ կարևոր էր, որ մենք գայինք ու մեր աչքերով տեսնեինք իրականությունը»,-ասում է պատգամավոր Շտեֆեն Քոթրեն: 

Գերմանացի խորհրդարանականների խումբն արդեն եղել է լեռնաքաղաք Շուշիում, տեսել թուրք-ադրբեջանական ագրեսիայի հետևանքով Սուրբ Ղազանչեցոց եկեղեցու կրած վնասները, շրջել են Արցախի մայրաքաղաք Ստեփանակերտով, ամենուր հանդիպել են ռմբակոծված տներ ու բնակելի շենքեր, որոնց հարևանությամբ ռազմական նշանակության օբյեկտներ չեն եղել։

«Մենք հաստատում ենք, որ Ադրբեջանը Թուրքիայի օգնությամբ հարձակվել է Արցախի խաղաղ բնակչության վրա, ինչը մեծ հանցագործություն է։ Մենք կոչ ենք անում բոլոր երկրների խորհրդարաններին դադարեցնել միայն խոսելը,՝պետք է սկսել գործել։ Պետք է Թուրքիայի ու Ադրբեջանի նկատմամբ պատժամիջոցներ կիրառվեն, որպեսզի այս պատերազմը շուտով վերջանա»,-ասաց Քոթրեն։

Գերմանացի պատգամավորների խոսքով, իրենց առաքելությունն է Արցախում տեսածը հասցնել իրենց երկիր ու Եվրոպա, պատմել իրականության մասին։ Նրանք համոզված են՝  խաղաղություն սիրող հասարակություններն ու կազմակերպություններն իրականությունն իմանալուց հետո հանդես կգան, իրենց ձայնը կբարձրացնեն ընդդեմ Ադրբեջանի ու կպահանջեն դադարեցնել պատերազմը։

«Մենք պատրաստ ենք խաղաղության համար քայլեր անել»,-նշեց գերմանացի պատգամավորը։

Նրանք ընդգծում են՝ ԼՂ-ում տեղի ունեցողը լոկալ պատերազմ, չէ, այլ մեծ կոնֆլիկտ։

«Մենք այստեղ ենք, որ եվրոպացի ժողովրդին արթնացնենք, ցույց տանք, թե ինչ է կատարվում այստեղ։ Մենք փորձում ենք լուծում գտնել Արցախի խնդրի կարգավորման համար։

Կարծում ենք, որ Մինսկի շրջանակում գործընթացը չի գործելու։ Շատ մարդիկ դեռ պետք է հասկանան Արցախի, Հայաստանի ու Ադրբեջանի միջև առկա խնդիրը»,-ասում է պատվիրակության մեկ այլ անդամ՝ Անդրեաս Կալբիցը ընդգծելով, Արցախում Ադրբեջանը թիրախավորել է քաղաքացիական շենքները, կրակել արգելված զենքերից։

Նա շեշտում է՝ այստեղ նոր ցեղասպանության վտանգ կա, փորձում են բնաջնջել Արցախի բնակչությանը։

«Դատապարտում ենք ագրեսիվ բոլոր քայլերը, ցանկանում ենք, որ հենց այս պահին այն դադարեցվի, պատերազմ ստանձնած երկրների՝ Ադրբեջանի ու Թուրքիայի նկատմամբ պետք է պատժամիջոցներ կիրառվեն»,-նշեց գերմանացի խորհրդարանականը։

Գերմանական պատվիրակության մեկ այլ անդամ Անդրեաս Գալաուն ընդգում է՝ բնակելի շենքերը թիրախավորվել են միտումնավոր, խաղաղ բնակչությանը վախեցնելու ու վնաս հասցնելու համար։ Նա միջազգային կառույցների ուշադրությունը հրավիրում է Ադրբեջանի կողմից Արցախի դեմ կռվող ահաբեկիչների, Սիրիայից ու այլ երկրներից բերված վարձկաների վրա։

«Եթե պարզվի, Ադրբեջանն այդ ահաբեկիչներին հատուկ բերում է Արցախի դեմ  կռվելու համար, ապա պետք է Ադրբեջանին համարենք միջազգային ահաբեկչությանը սատարող երկիր»,-ասաց

Նրանք ընդգծում են՝ Գերմանիան չի կարող այս պատերազմում Հայաստանին զենքով օգնել, բայց կարող է Անկարայի նկատմամբ պատժամիջոցներ կիրառել՝ օրինակ զենքի էմբարգո, որոշ անձանց մուտքի արգելք, բանկային հաշիվներից օգտվելու հնարավորության բացառում։

«Հենց այս պահին մենք նստած ենք Արցախում՝ Ստեփանակերտում։ Այստեղից Բեռլինին կոչ ենք անում՝ ազդել Անկարայի ու Բաքվի վրա»,-ասաց գերմանացի պատգամավորը։

Ասուլիսին ներկա լրագրողներից մեկը գերմանացի պատգամավորներին փոխանցեց Շուշիի եկեղեցին վնասած զենքի մի կտոր, որի վրա կա սերիա, համար։ Նա հույս հայտնեց, որ եվրոպացի խորհրդարանականներին դա կօգնի հետաքննություն իրականացնել և ապացուցել, որ ՆԱՏՕ-ի անդամ Թուրքիան պատերազմ է հրահրում ու աջակցում։

Ի պատասխան գերմանացի պատգամավորները շնորհակալություն հայտնեցին, որպես ՆԱՏՕ-ի անդամ երկրի ներկայացուցիչներ ասացին՝ անընդունելի է, որ կազմակերպության անդամ երկրներից մեկը՝ Թուրքիան նման պատերազմ է սանձազերծում։