Ձեր վստահելի աղբյուրը

Հայաստանում Իտալիայի դեսպանատան շենքի դիմաց այս պահին բազմամարդ է։ Մի շարք քաղաքացիներ պահանջում են դեսպանատան ներկայացուցիչների հետ հանդիպում։

«Դուրս եկեք։ Դուրս եկեք։ Դուրս եկեք ու նայեք այս նկարներին։ Արցախն անկախ է։ Ազատ, անկախ Արցախ»,- պահանջում են քաղաքացիները։

Ակցիայի մասնակիցները դեսպանատան դիմաց կատարեցին Հայաստանի օրհներգը, հայրենասիրական երգեր։

Ակցիայի մասնակիցներն իրենց ձեռքերում ունեն՝ «Լռությունը ցեղասպանություն է», «Ճանաչեք Արցախը» ու այլ գրություններով ցուցապաստառներ։

«Այն ամենը, ինչ մենք ուզում ենք, խաղաղությունն է։ Եվ դուք տեսնում եք, որևէ մեկը դուրս չի գալիս մեզ լսելու։ Ինչո՞ւ դուրս չեն գալիս։ Մենք կսպանե՞նք նրանց։ Ոչ, իհարկե, մենք ոչ Էրդողանն ենք, ոչ էլ Ալիևը։ Մենք հայ մարդիկ ենք, որոնք պայքարում են ահաբեկչության դեմ, ընդ որում պայքարում ենք միայնակ, պայքարում ենք հանուն խաղաղության։ Ո՞վ է մեզ պատասխան տալու, երբ վարձկանները, ադրբեջանցի ու թուրք զինվորները գալիս են մի նոր ցեղասպանություն իրագործելու»,- լրագրողների հետ զրույցում անգլերենով հայտարարեց ակցիայի մասնակից մի երիտասարդ աղջիկ։

Հիշեցնենք, որ Իտալիան այն հինգ երկրների թվում է, որոնք դեմ քվեարկեցին Հունաստանի նախաձեռնությամբ Թուրքիայի նկատմամբ պատժամիջոցների կիրառմանը։