Ձեր վստահելի աղբյուրը

Տնտեսական հարցերի մշտական հանձնաժողովի այսօրվա նիստում նախագահող  Բաբկեն Թունյանը  հայտնեց, որ օրակարգում կա առաջին ընթերցման 3 հարց և երկրորդ ընթերցման  6 հարց, սակայն դրանցից հրատապ է համարվել միայն երկուսը:

Հանձնաժողովում ներկայացվեց Հարկային օրենսգրքում  և «Պետական գույքի մասնավորեցման 2017-2020 թվականների ծրագրի մասին» օրենքում փոփոխություն կատարելու մասին նախագծերը:

Ներկայացնելով առաջին նախագիծը՝ Էկոնոմիկայի նախարարի տեղակալ Ավագ Ավանեսյանը հայտնեց, որ օրենքում կա կետ, որով արգելվում է մասնագիտացված խանութներում կազմակերպության 10 տոկոսից ավելի ենթաակցիզային ապրանքների վաճառքը:

Նրա խոսքով, այն արվում էր հարկերից խուսափման քայլերը կանխարգելելու համար, բայց նոր սերնդի ՀԴՄ-ների ներդրումը  բացառել է նման դեպքերը և հիմա ավելորդ վարչարարություն է իրականացվում, որը խոչընդոտում է հարկային լրացուցիչ մուտքերին: Փոխնախարարը հայտնեց, որ այդ պատճառով էլ կառավարությունը որոշել է այդ կետը հանել:

Նա նաև հայտնեց, որ օրենքն ունենալու է հետադրաձ ուժ և նախկինում հայտնաբերված 10-ից ավելի տոկոս վաճառքի դեպքերի համար սահմանված վարչական տույժերը չեն կիրառվի:

Երկրորդ նախագծի հիմնավորման մեջ ասվում է, որ «Ավտոմոբիլային տրանսպորտի մասին» օրենքի 10-րդ հոդվածի համաձայն միջպետական, միջմարզային և ներմարզային ավտոբուսային կանոնավոր փոխադրումների երթուղային ցանցերը կազմակերպում է Տարածքային կառավարման և ենթակառուցվածքների նախարարությունը, ուստի փոխոսությամբ առաջարկվում է ` «Հայավտոկայարան» ՓԲԸ-ի պետական սեփականություն հանդիսացող բաժնետոմսերի կառավարման լիազորությունները վերապահել նախարարությանը:

Հանձնաժողովը հաստատեց երկու նախագծերը, որոնք երկրորդ ընթերցմամբ կընդգրկվեն ԱԺ լիագումար նիստ: