Պոմպեոն հույս ունի, որ կողմերի հետ հանդիպումներից հետո հնարավոր կլինի նոր զինադադար հաստատել. Լոս Անջելեսում ՀՀ գլխավոր հյուպատոս
«Ադրբեջանի և Թուրքիայի սանձազերծած ագրեսիան Արցախի և Հայաստանի դեմ շարունակվում է, և այն շարունակվում է միջազգայնորեն դատապարտելի միջոցներով՝ այդ թվում ռազմական հանցագործությունների կատարմամբ»,- այսօր Լոս Անջելեսում անցկացվող ակցիայից հետո անցկացվող մամուլի ասուլիսի ընացքում ասաց Լոս Անջելեսում ՀՀ գլխավոր հյուպատոս, Արմեն Բայբուրդյանը։
Նրա խոսքով, Ադրբեջանի և Թուրքիայի կողմից ռազմական հանցագործությունների կատարման պատճառով ստեղծվել է մարդասիրական լուրջ ճգնաժամ, Արցախում ավերվել ու ոչնչացվել են բազմաթիվ քաղաքացիական ենթակառուցվածքներ ու քաղաքներ։
«Հարձակման են ենթարկվել նաև առանձին բնակավայրեր ՀՀ-ում։ Մարդասիրական այդ ճգնաժամը մի նրբերանգ ունի՝ Արցախում ժողովուրդը զրկված է միջազգային կազմակերպությունների կողմից մարդասիրական օգություն ստանալու հնարավորությունից։ Բոլոր միջազգային կազմակերպությունները, քաղաքական խնդիրներից ելնելով, հրաժարվում են մարդասիրական օգնություն ցույց տալ Արցախի հայությանը, որը գտնվում է ծայրահեղ ծանր իրավիճակում։ Եվ այս վիճակի ամբողջ տարօրինակությունը կայանում է նրանում, որ այնտեղ ապրում են մարդիկ, որոնք ունեն մարդասիրական օգնության կարիք, բայց միջազգային կազմակերպությունները և երկրները հնարավորություն չունեն՝ տրամադրելու այդ օգնությունը՝ ներառյալ երեխաներին, կանանց և տարիքավորներին»,- ներկայացրեց Արմեն Բայբուրդյանը։
Ըստ նրա, համաճարակային աղետալի իրավիճակ է ստեղծել, քանի որ ադրբեջանական կողմն իր սպանված զինծառայողների մարմինները թողնում է մարտի դաշտում։ Նա նշեց, որ այսօր շատ լուրջ վտանգ և սպառնալիք է գոյացել ոչ միայն Արցախի, Հայաստանի և Ադրբեջանի համար, այլ նաև մասնագետների գնահատմամբ, շատ ավելի լայն շրջանակի համար.
«Այդ աղետը կարող է տարածվել տարածաշրջանից դուրս։ Նշեմ նաև, որ փաստված է՝ Ադրբեջանը և Թուրքիան կիրառում են զենքեր, որոնք արգելված են միջազգային բոլոր օրենքներով։ Ինչպես գիտեք՝ զինադադարի երկու փորձ եղավ՝ մեկը՝ հոկտեմբերի տասին, մյուսը՝ տասնութին։ Այդ երկու հրադադարներն էլ Ադրբեջանի կողմից չպահպանվեցին։ Ադրբեջանը հրաժարվում է վերիֆիկացիոն մեխանիզմներ ստեղծել, որոնք հնարավորություն կտան միանգամից արձանագրել, թե ով է խախտում հրադադարի ռեժիմը։
Այդ դրույթը ներկայումս էլ քննարկվում է միջնորդների՝ մասնավորապես Մոսկվայի կողմից։ Եվ հայկական կողմը չափազանց կարևոր է համարում այդպիսի մեխանիզմի հաստատումը։ Այսօր մենք գործ ունենք թուրքական ագրեսիայի հետ, ոչ միայն Թուրքիայի մասնակցությամբ ադրբեջանական ներխուժման, այլ նաև անմիջական ագրեսիայի կողմից։ Թուրքիան խնդիր է դրել իր ազդեցությունը ընդլայնել տարածաշրջանում՝ հայերի էթնիկ զտում կատարելու միջոցով։ Եվ ամենևին պատահական չէ, որ մենք անմիջապես վերհիշում ենք ցաղասպանության շարունակության հնարավորությունը»։
Արմեն Բայբուրդյանը տեղեկացրեց, որ Թուրքիան ձգտում է Մինսկի խմբի համանախագահող երկիր դառնալ։ Ըստ նրա, Թուրքիան կողմնակալ է այս հակամարտությունում, և անթույլատրելի է նրա մասնակցությունը այդպիսի ձևաչափին, քանի որ նա հենց ինքն ագրեսոր է։
«Այստեղ շատ հստակ է, որ համանախագահ երկրները՝ ՌԴ-ն, ԱՄՆ-ն և Ֆրանսիան ձգտում են, որ այդ ձևաչափը պահպանվի։ ԵԱՀԿ համանախագահները միակարծիք են, որ պետք է հրադադար հաստատվի, բայց չեն կարողացել ապահովել խաղաղություն և հակամարտության կարգավորում։ Այս է պատճառը, որ Ադրբեջանը դիմում է ռազմական ուժի կիառման։ Բայց իրականությունն այն է, որ Ադրբեջանն ինքն է վիժեցրել համաձայնության բոլոր փորձերը։ Մենք կարծում ենք, որ ԱՄՆ վարչակազմը պետք է ավելի գործնական քայլեր անի՝ Թուրքիային սաստելու համար։ Ինչպես գիտեք, վաղը ՀՀ արտգործնախարարը լինելու է Վաշինգտոնում, և հանդիպելու է Մայք Պոմպեոյի հետ, այստեղ է լինելու նաև Ադրբեջանի արտգործնախարարը, բայց ընդհանուր հանդիպում չի լինելու։ Մայք Պոմպեոն հույս ունի, որ այս հանդիպումներից հետո հնարավոր կլինի նոր զինադադար հաստատել»,- շեշտեց նա։
Հարակից հրապարակումներ`
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
