Ձեր վստահելի աղբյուրը

Ադրբեջանի նախագահը հայտարարել է,  որ սկզբունքորեն դեմ չէ խաղաղապահների տեղակայմանը տարածաշրջանում, բայց առաջ կքաշի իր պայմանները: ՀՀ վարչապետ Նիկոլ Փաշինյանը երեկ Ինտերֆաքսին տված հարցազրույցում ասել է, որ «մեզ համար ընդունելի է խաղաղապահ ուժերի տեղակայումը»։ Panorama.am-ը դիմեց քաղաքագետ Հրանտ Մելիք-Շահնազարյանին, թե ինչպե՞ս կգնահատի այս հայտարարությունները և արդյո՞ք այդ հայտարարություններին կարող է հետևել խաղաղապահների տեղակայումը տարածաշրջանում։

Panorama.am- Հայաստանի ու Ադրբեջանի ղեկավարները, կարծեք թե, դեմ չեն  տարածաշրջանում խաղաղապահների տեղակայմանը, ի՞նչ կարող է հետևել այդ հայտարարություններին և ի՞նչ սպասել։

Հ.Մելիք-Շահնազարյան-Դեմ չլինելը դեռևս չի նշանակում, որ կողմերն իրենց  համաձայնության են տվել խաղաղապահներ տեղակայելու հարցում։ Կարծում եմ՝ Ալիևն այդ հարցում բավական, մեղմ ասած, անկեղծ չէ. մի կողմից ասել, որ կարելի է քննարկել, բայց այդ քննարկումների  փուլին չի անցնում, ամեն կերպ հետաձգում է։ Փաստացի կարող ենք ասել, որ Ադրբեջանի կողմից խաղաղապահների տեղակայման հետ կապված համաձայնություն չկա։ Փաստացի չկա համաձայնության նաև Հայաստանից, բայց Հայաստանի դիրքորոշումն, ի տարբերություն Ադրբեջանի,  շատ ավելի միանշանակ է, ակնհայտ է, որ հայկական կողմը դեմ չէ խաղաղապահների տեղակայմանը։

Ալիևը ցանկանում է այստեղ տեսնել խաղաղապահների, բայց թուրք, որոնց խաղաղապահ ասել անհնար է, չի կարելի։ Այդպես հող է ստեղծում Թուրքիայի՝ տարածաշրջան ներխուժելու համար, որը, իմ կարծքիով, մեծ ռիսկեր է  պարունակում ոչ միայն Հայաստանի, այլ տարածաշրջանում  աշխարհաքաղաքական շահ հետապնդող երկրների՝ Ռուսաստանի, Իրանի, ինչու չէ նաև Արևմուտքի համար։

Panorama.am- Այսօր Հայաստանի արտաքին գործերի նախարար Զոհրաբ Մնացականյանը ղարաբաղյան հակամարտության կարգավորման հարցով հանդիպում է ունենալու ԱՄՆ   պետքարտուղարի հետ։ Ի՞նչ ակնկալիքներ ունեք այդ բանակցություններից։

Հ.Մելիք-Շահնազարյան -Անկեղծ ասած, որևէ սպասելիք չունեմ ԱՄՆ-ից՝ հասկանալով որ տարածաշրջանում քաղաքական խնդիրների լուծման վայրը Մոսկվան է, Վաշինգտոնը չէ։ ԱՄՆ նախագահ Թրամփի վարչակազմի համար կարևոր է այդ հանդիպումն ընտրություններից առաջ, որպեսզի ցույց տան, որ աշխարհաքաղաքական ազդեցություն ունեն Հարավային Կովկասում, կարող են դրական դերակատարում ունենալ։ Բայց դա ընդամենը Հայաստանի, նաև Ադրբեջանի կողմից, անգամ Ռուսաստանի կողմից հարգանքի տուրք է մատուցված Վաշինգտոնին, որ մի հատ էլ հանդիպում այնտեղ անցկացվի։

Panorama.am-Դուք ասացիք, որ խնդրի լուծման բանալին Մոսկվայում է։ Քիչ առաջ Արցախի Հանրապետության նախագահ Արայիկ Հարությունյանը դիմել է Ռուսաստանի նախագահ Վլադիմիր Պուտինին պատերազմի դադարեցման խնդրանքով։ Կարելի՞ է ենթադրել, որ նա էլ է այդ կարծիքին։

Հ.Մելիք-Շահնազարյան-Դա կարծիք չէ, օբյեկտիվ իրողություն, որ հասկանում են բոլորը։

Panorama.am-Ինչո՞ւ է այդ խնդրանքը Ստեփանակերտից ուղղվում Մոսկվա։

Հ.Մելիք-Շահնազարյան -Ագրեսիայի է ենթարկվել Արցախը։ Արցախն այսօր դիմակայում է  ոչ միայն ադրբեջանական ագրեսիային, այլ թուրքական բանակին, ահաբեկիչներին։ Դրա համար Արցախի նախագահը, որպես պատասխանատու ղեկավար ոչ միայն Արցախի, ընդհանրապես  տարածաշրջանի անվտանգության համար, օգնության կոչով դիմել է Ռուսաստանի նախագահին։ Մինչ այդ էլ դիմել և ստացել էր Հայաստանի իշխանությունների, ժողովրդի լիարժեք օգնությունը։

Panorama.am-Շնորհակալություն զրույցի համար։