Ձեր վստահելի աղբյուրը

Պատերազմական իրավիճակով պայմանավորված՝ բանակին օգնելու գործին սեփական նախաձեռնությամբ միացել են նաև առանձին աշակերտներ ու դպրոցներ: ԿԳՄՍ նախարարությունից նշում են, որ Հայաստանի տարբեր բնակավայրերից բազմաթիվ փոքրիկներ նվիրատվություն են կատարում. անվարան նվիրում են թե՛ իրենց երազանքի համար խնայատուփերում տարիներով կուտակած գումարները, թե՛ իրենց կազմակերպած փոքրիկ նախաձեռնություններից ստացված հասույթը:

Արմավիրցի Վահեն առաջիններից էր, որ ընկույզ վաճառելով սկսեց օգնել զինվորին. 100 դրամ՝ մեկ ընկույզի դիմաց: Օրեր շարունակ դասերից հետո 6-ամյա փոքրիկը ընկույզ է վաճառել ու ստացված գումարը փոխանցել հիմնադրամին: Վահեի օրինակը վարակիչ է դարձել: Փոքրիկ Աննան, օրինակ, տարբեր ֆիգուրներով գիպսեր է պատրաստում, թևնոց գործում ու վաճառում: Ասում է՝ իր համար վիրավորական է, որ գումարը տալիս են առանց ապրանքը վերցնելու:

Արմավիրի մարզի Նորավան համայնքի դպրոցի աշակերտները վեց օր շարունակ դիմակ են վաճառել քաղաքացիներին՝ այդպիսով իրենց ազգանվեր ներդրումն ունենալով թե՛ թիկունքի, թե՛ ճակատի համար: Վաճառքի գումարը կազմել է 1.766.500 դրամ և տրամադրվել հիմնադրամին: Լոռու մարզի Մեծավան գյուղի փոքրիկ բնակիչները գումար են հավաքել և շուրջ 68 հազար դրամը ներկայացրել են համայնքապետարան, որ փոխանցեն հիմնադրամին:

Սահմանին օգնության են հասել նաև սահմանաբնակները: Սահմանապահ Ներքին Կարմիրաղբյուրի միջնակարգ դպրոցի 9-րդ դասարանի աշակերտները ուսուցիչների նախաձեռնությամբ՝ արքայանարինջ են վաճառում: Աշակերտների խոսքով՝ գյուղում շատերն արքայանարնջի ծառեր ունեն, և երբ լուրը տարածել են, բոլորը մեծ պատրաստակամությամբ օգնել են իրենց. «Ասում էին՝ ինչքան պետք է, եկեք քաղեք»:

Տասնամյա Թինան հեծանիվ ունենալու երազանքը փոխարինել է հաղթանակի սպասումով՝ 51.500 դրամ փոխանցելով հիմնադրամին: Թինային է միացել նաև նրա քույրիկը՝ 11-ամյա Սոնան՝ 71.800 դրամով: Քույրիկների երազանքն այժմ ոչ թե հեծանիվն է, այլ ուղղաթիռը, որը պետք է գնվի բանակի համար իրենց փոքրիկ ներդրումով: Էլեն ու Մերի քույրիկները ևս ամիսներ շարունակ հավաքած գումարով սքեյթ ու տիկնիկներ գնելու փոխարեն, այն փոխանցել են հիմնադրամին՝ հանուն խաղաղության ու անհոգ մանկության: Մհերը 2 տարի գումար էր հավաքել Եգիպտոսը տեսնելու համար, բայց կուտակած գումարով կանգնել է ավագ ընկերների կողքին։ Կիթառահար եղբայրներն էլ նվագում են անցորդների համար և հասույթը նվիրաբերում բանակին:

Մասնավոր դպրոցներից մեկում սովորող 13-ամյա Արեգը հայոց բանակի կողքին է նաև բարձր առաջադիմությամբ, որի համար ստացած 250.000 դրամ կրթաթոշակն ամբողջությամբ նվիրաբերել հիմնադրամին: Բազմաթիվ երեխաներ էլ իրենց աշխատանքով են աջակցում թիկունքին՝ օգնելով ծնողներին ու ավագ ընկերներին: Ոմանք մասնակցում են բանակի համար հոսանքի փոխակերպիչների արտադրության գործընթացին:

Ջավախքցի երեխաները նույնպես հետ չեն մնում։ Jnews-ը գրում է, որ 10-ամյա Բիչախչյան Հակոբը, վերջերս հակաճգնաժամային ծրագրի շրջանակներում Վրաստանի կառավարությունից ստացել էր իրեն հասանելի ֆինանսական օգնությունը՝ 200 լարին: Նա նախատեսում էր մի կողմ դնել այդ գումարը և խնայել այն, որն անհրաժեշտ էր իրեն կվադրոցիկլ գնելու համար, որի մասին նա երազում է գրեթե ամեն օր: Նա Արցախին աջակցելու համար այդ գումարը նվիրաբերել է «Ջավախք» հիմնադրամին:

«Ես որոշեցի հանգանակել այս գումարը, քանի որ տեսնում եմ, թե ինչպես են հայերը պայքարում: Բոլորն էլ գիտեն, որ հիմա պատերազմ է: Նվիրաբերվել եմ հայերի հաղթանակի համար: Չէ որ բոլորը կարտոֆիլ, փող են հավաքում, ինչը նշանակում է, որ Ղարաբաղը օգնության կարիք ունի», – ասում է Հակոբը: