Ձեր վստահելի աղբյուրը

Հայաստանում կորոնավիրուսային վարակով համաճարակային իրավիճակը շարունակում է մնալ լարված, դեպքերն էլի աճում են: Panorama.am-ի հետ զրույցում առողջապահության նախարարության «Հիվանդությունների վերահսկման և կանխարգելման ազգային կենտրոնի» գլխավոր տնօրենի տեղակալ Գայանե Սահակյանն ասաց, որ 2000-ից ավելի դեպքեր են գրանցվում, առայժմ աճի միտումը շարունակվում է, բարձր թվերը կայուն մնում են: 

«Այսօր վիրուսի վերարտադրողականության գործակիցը, այսինքն վիրուսի տարածման գործակիցը գրեթե 1,4 է, ինչը նշանակում է, որ մեկ անձը մեկից ավելի մարդու է վարակում: Սա  չի խոսում նվազման մասին, այլ աճի և աճի պրոցեսը դեռ կշարունակվի»,- ասաց նա:

Գայանե Սահակյանի խոսքով, հիվանդության կլինիկական դրսևորումը փոփոխության չի ենթարկվել, այսինքն՝  բարձր ջերմություն, ցավեր, ընդհանուր թուլություն, հատուկ թոքաբորբի զարգացում՝ շատ արագ:

«Մեր հիվանդանոցային ողջ ֆոնդը գերհագեցած է, աշխատում է  գերծանրաբեռնված:
Չեմ կարող ասել, որ հիվանդության թեթև դեպքերը շատացել են: Ոչ, նույն համամասնությամբ այսօր գնում են՝ նույն ծանրությամբ, նույն կլինիկական դրսևորմամբ»,- ասաց ԱՆ ներկայացուցիչը:

Հիվանդությունից հիմնականում մահանում են նրանք, ովքեր ունեն ուղեկցող քրոնիկական հիվանդություններ։

«Դարձալ առաջին ռիսկի խումբն այն մարդիկ ենք, որոնք ունեն ուղեկցող հիվանդություններ, որի դեպքում կորոնավիրուսային վարակը ծանր ընթացքով է դրսևորվում և բարձր տարիքի անձիք: Դեռ նույն միտումը շարունակվում է, մահերը գերազանցապես գրանցվում են հենց այդ երկու խմբերի շրջանում՝ տարիքով մարդիկ և ուղեկցող քրոնիկ հիվանդություն ունեցողներ»,- նշեց Գ. Սահակյանը: 

Հարցին՝ տարիքային խումբը երիտասարդացե՞լ է, նա պատասխանեց.«Տարբերություն չունենք, նույն միտումը շարունակվում է, մահերն առավելապես գրանցում է 70-ից բարձր անձանց շրջանում, հիվանդությունը՝ 49-65 ու 65-ից բարձր տարիքի անձնաց շրջանում: Այս  տարիքային դրսևորումն ունեցել ենք նաև նախորդ ժամանակաշարջանում:

Մեր այսօրվա դիտարկումները դա ցույլ չի տալիս»:

Գ. Սահակյանն ասաց, որ գտնվում ենք սեզոնային սուր շնչական վիրուսների, գրիպի աշխուժացման փուլում:

«Այս պահի դրությամբ երկուսը կարող են խառնվել, մարդիկ իրենք էլ շփոթության մեջ ընկեն: Բոլոր դեպքերում գրեթե ախտանիշները նույնն են: Եթե ծանր վիճակը շարունակվում է, շարունակաբար ախտանիշները գրանցվում են, կատարվում է  բացառման մեթոդով հետազոտություն, այսինքն կորոնավիրուսային վարակի նկատմամբ նմուշառում, հետազոտություն, եթե բացասական է լինում, արդեն դա վերագրվում է  սուր շնչառական վիրուսային վարակին:

Սա էլ 100 տոկոսանոց չէ, որովհետև մենք ունենք կորոնավիրուսային վարակին բնորոշ կլինիկական դրսևորում՝ ծանր թոքաբորբ, նույնը, ինչ դրականների մոտ, բայց այդ անձանց մոտ, որոշ դեպքերում, հետազոտությունը լինում է  բացասական: Սա հիմնականում պայմանավորված է նրանով, որ վիրուսը սկզբնական շրջանում վերին շնչառական ուղիներում է  բազմանում, գոյատևում, հետագայում ավելի խորը հատված է  անցում՝ ստորին շնչառական ուղիներ, վերին շնչառականից՝ թիք-ըմպանի հատվածից նմուշառման դեպքում այն կարող է պարզապես չհայտնաբերվել: Իսկ եթե ավելի խորը հատվածներից նմուշառում կատարվի, գուցե հայտնաբերվի, հավականությունն այդ դեպքում ավելի բարձր կլինի, որ հայտնաբերվի»,- ասաց մասնագետը:

Գայանե Սահակյանը կորոնավիրուսով արդեն հիվանդացած ու դեպի ապաքինում գնացող մարդկանց խորհուրդ է տալիս, ինչպես բոլոր վիրուսային վարակների դեպքում, մաքուր օդ, ֆիզիկական ակտիվություն, շատ հեղուկների, վիտամին C-ի ընդունում: