Ձեր վստահելի աղբյուրը

Ադրբեջանի կողմից Արցախի դեմ նախաձեռնված լայնամասշտաբ պատերազմի ընթացքում ադրբեջանական ուժերի կողմից գերեվարված զինծառայողների ընտանիքի անդամների անունից հայաստանցի իրավաբանների խումբը շարունակում է հրատապ միջոց կիրառելու մասին դիմումներ ներկայացնել Մարդու իրավունքների եվրոպական դատարան։

Երեկ հայտնի դարձավ, որ ռազմագերի Ալբերտ Միքայելյանի մասով Հայաստանը ևս գանգատ է ներկայացնել ՄԻԵԴ՝ խնդրելով կիրառել հրատապ միջոց և որպես հայցի ապահովման միջոց՝ պարտավորեցնել Ադրբեջանի կառավարությանը՝ ապահովել Ալբերտ Միքայելյանի կյանքի անձեռնմխելիությունը և նրա առողջության իրավունքը, բժշկական օգնության տարմադրումը, արտաքին աշխարհի հետ կապը և ընտանիքի անդամների հետ կոնտակտն ու փոխանակման հարցը:

Panorama.am-ը նոր հայցերի վերաբերյալ զրուցել է փաստաբան Սիրանուշ Սահակյանի հետ։

Panorama.am- Տիկին Սահակյան, վերջին անգամ Ձեզ հետ խոսել ենք հոկտեմբերի 23-ին, երբ սպասում էիք ՄԻԵԴ-ի ծանուցմանը։ Ստացե՞լ եք Եվրոպական դատարանի որևէ գրություն երկու ռազմագերների՝ Արեգ Սարգսյանի և Նարեկ Ամիրջանյանի վերաբերյալ Ադրբեջանին առաջադրած հարցերի պատասխանների մասին։

Սիրանուշ Սահակյան- Հոկտեմբերի 22-ը վերջնաժամկետ էր, որպեսզի Ադրբեջանի  կառավարությունը այդ ռազմագերիների առնչությամբ տեղեկություններ տար ՄԻԵԴ-ին։ Դրանից հետո  դատարանը կամ պետք է  նոր որոշում կայացնի, կամ տեղեկատվությունը փոխանցի մեզ՝ հարցեր քննարկելու նպատակով։ Այս պահին դատարանից դեռ գրություն չենք ստացել, բայց վստահ չենք կարող մեկնաբանել, կամ Ադրբեջանը որևէ տեղեկատվություն չի տրամադրել դատարանին, և տարբերակ 2. տրամադրել է, դատարանում քննարկումներ են տեղի ունենում, որից հետո նոր այդ տեղեկատվությունը կփոխանցվի մեզ։ Մի փոքր էլ սպասենք, մինչև հստակություն լինի։

Panorama.am-Այս պահին Եվրոպական դատարան քանի՞ հայ ռազմագերու մասով է դիմում ներկայացված։

Սիրանուշ Սահակյան- Եվրոպական դատարան ներկայացված է վեց գործ, երկու ռազմագերիներից՝ Արեգ Սարգսյանից և Նարեկ Ամիրջանյանից գործից զատ, ունենք մի գործ, որով դատարանը հսկողություն է սահմանել, Սամվել Ասատարյանի գործի մասին է խոսքը։ Երեք ռազմագերիների առնչությամբ սպասում ենք պատասխանի, որը կարող է լինել այսօր կամ վաղը։

Ինչ վերաբերում է տարածված տեսանյութում հայտնված ութ ռազմագերիներին, այստեղ մենք  աշխատում ենք համագործակցված, քանի որ կա միջպետական գանգատ, որի շրջանակում կառավարությունն անհապաղ միջոց է պահանջել, կրկնողությունը բացառելու համար նույն միջոցն անհատական գանգատի շրջանակում չի պահանջվել։ Սա չի բացառում հետագայում ութ  ռազմագերիների գործով անհատական գանգատների ներկայացում, սակայն անհապաղ միջոց պահանջվել է կառավարության նախաձեռնությամբ։ Այս հարցով աշխատում է կառավարությունը։

Panorama.am- Սամվել Ասատրյանի դիմումի մասով այս պահին ի՞նչ է հայտնի։

Սիրանուշ Սահակյան- Դատարանն Ադրբեջանից տեղեկատվություն է պահանջել  և դրան պատասխանելու համար որպես վերջնաժամկետ սահմանել է հոկտեմբերի 29-ը։ Հարցադրումները վերաբերում են գերեվարության հանգամանքերին, պահման պայմաններին, առողջական վիճակին։

Panorama.am- Բացի ՄԻԵԴ ներկայացված վեց դիմումներից, ձեզ այլ ռազմագերիների հարազատներ դիմե՞լ են։

Սիրանուշ Սահակյան- Այս պահին ևս երեք ռազմագերու վերաբերյալ տեղեկություններ ունենք, բայց դրանից մեկի մասով տեսանյութ կա։ Երկուսի առնչությամբ տեսանյութեր չկան, բայց ականատեսներ կան, ուստի փորձում ենք  ավելի հստակեցնել փաստերը, ուժեղացնել ապացույցները, որից հետո նոր կդիմենք։ Պատրաստման գործընթացում է գտնվում մեկ գործ՝ Արսեն Կարապետյանի մասին է խոսքը։

Panorama.am- Ձեր խումբը զբաղվում է միա՞յն ռազմագերների վերաբերյալ դիմումներով, թե՞ կան նաև գերիների հետ կապված դիմումներ կամ գործեր։

Սիրանուշ Սահակյան- Այս պահին մեր տեղեկատվությամբ, հայտնի դեպքերը վերաբերել են ռազմագերիներին, այսինքն՝ քաղաքացիական անձի մասին, որը գերավարության մեջ է, մեր խումբն ուղղակի տեղեկատվություն չունի։

Panorama.am- Հոկտեմբերի 17-ին հայտնի դարձավ, որ գերեվարված  Արեգ Սարգսյանը և Նարեկ Ամիրջանյանը զանգահարել են ծնողներին, ողջ են, գտնվում են հոսպիտալում։ Դրանից հետո այլ ռազմագերիներ կապ հատատե՞լ են ծնողների, հարազատների  հետ։

Սիրանուշ Սահակյան- Կապ չի եղել, մենք գիտենք, որ ծնողները կապի մեջ են Կարմիր Խաչի գրասենյակի հետ, որտեղից հայտնում են ռազմագերիների մասին տեղեկություններ, բայց շփումների մասին նոր տեղեկություններ, որոնք տարածվում են Կարմիր Խաչի միջոցով, չունենք։

Panorama.am- Շնորհակալ եմ, կա՞ մի բան, որ կուզեիք ավելացնել։

Սիրանուշ Սահակյան- Երևի թե չէ, սպասենք, երևի թե դատարանի որոշումն էլ մեծապես կախված  է լինելու հնարավոր հրադադարից ու դրա հաստատման հնարավորություններից, եթե շատ ձգձգվի միգուցե դատարանն ավելի մեծ պատասխանատվությամբ ներգրավվի ռազմագերիների փոխանակման պրոցեսում։