Ձեր վստահելի աղբյուրը

«Երեկ, ցավոք, երեկոյան ուշ ժամի մարտերի ընթացքում հակառակորդին հաջողվեց գրավել Կուբաթլուն և որոշ ուղղություններով առաջանալ։ Վաղը մենք ինտերակտիվ քարտեզով ավելի հստակ ցույց կտանք այդ տարածքները»,-տեղեկատվական կենտրոնում հայտարարեց ՊՆ ներկայացուցիչ Արծրուն Հովհաննիսյանը՝ ամփոփելով առաջնագծում տեղի ունեցած իրադարձությունները։

Նրա խոսքով, այսօր վաղ առավոտյան, ինչպես հայտնել է պաշտպանության բանակը, ադրբեջանական զինված ուժերը, որոնց միացած են ահաբեկիչներ, ինչպես նաև այլ պետությունների զորաբաժանումներ, հարավ-արևելյան ուղղությամբ լայնամասշտաբ հարձակում են ձեռնարկել մի քանի ուղղություններով՝ միաժամանակ հրետակոծելով, ռմբակոծելով Արցախի քաղաքները։

«Արդեն պաշտոնական հաղորդագրություն քաղաքացիական անձանց զոհվելու և վիրավորվելու մասին։ Ողջ օրվա ընթացքում այդ հրոսակախմբերին չի հաջողվել ճեղքել ռազմաճակատը՝ տվյալ բնագիծը, չնայած որոշ տեղերում թվացյալ հաջողություն են ունեցել, սակայն մեր ստորաբաժանումներին հաջողվել է հակագրոհով հետ վերցնել և վերականգնել առաջնագիծը»,-ասաց Ա. Հովհաննիսյանը։

Նրա խոսքով, շարունակվել է Հադրութից հյուսիս գտնվող անտառներում դիվերսիոն խմբերի փնտրման ու ջախջախման գործողությունները, ինչի հետևանքով նրանք թողել են նույնիսկ մեքենաներն ու փախել։

«Սակայն մի քանի գյուղերում մարտերը շարունակվում են՝ Շեխեր, Ջիվանիկ, Ազոխ և հարակից այլ գյուղերում։ Որոնման ու ջախջախման գործողությունները շարունակվում են։ Այո, իմ հարգելի ժողովուրդ, հակառակորդը որոշ հատվածներում ունեցել է հաջողություններ, այո, նրանք մոտեցել են Սյունիքի դարպասներին, բայց իրավիճակը ծայրահեղ չէ։ Ես հավատում եմ հայ զինվորի բազկին, խելքին, հմտությանը, տոկունությանը։ Հայ զինվորը եթե ինչ-որ տեղերում նահանջել է, ապա շատ տեղերում էլ փախուստի է մատնել աշխարհի առաջատար բանակների հատուկ ջոկատայիններին, և սա կրկնվում է գրեթե ամեն օր»,-ասաց նա։

Նա նշեց, նահանջներ հաճախ են լինում, քանի որ մարդկային կյանքերն առավել թանկ են, բայց դրանք ճակատագրական չեն։

«Վիճակը ծանր է, մարտերը՝ դաժան, պատերազմը՝ սաստիկ, բայց անելանելի չէ։ Այսօր շատ հաճախ հայ գեներալը ավտոմատը ձեքռին կռվում է, կանգնած է զինվորի, կամավորի կողքին։ Ես վստահ եմ, որ հաղթելու ենք, որովհետև այլընտրանք չունենք, սա մեր գոյության կռիվն է»,-ասաց նա։