Ձեր վստահելի աղբյուրը

ՀՀ Քննչական կոմիտեում հարուցված քրեական գործերի նախաքննության ընթացքում ձեռք բերված փաստական  տվյալները հիմնավորվում են Ադրբեջանի ռազմաքաղաքական ղեկավարության կողմից նախապես ծրագրված, կազմակերպված ու իրականացված  բոլոր հանցավոր դեպքերը։ Ասուլիսում ասաց ՀՀ Քննչական կոմիտեի Քրեագիտական վարչության պետ Ռաֆայել Վարդանյանը։

Նա նշեց, որ Ադրբեջանի ռազմաքաղական ղեկավարությունը ԶՈւ գերագույն գլխավոր հրամանատար, նախագահ Իլհամ Ալիևի, պաշտպանության նախարար Զաքիր Հասանովի և այլ բարձրաստիճան զինվորական պաշտոնյաների ընդհանուր հրամանատարությամբ, Թուրքիայի ռազմաքաղաքական ղեկավարության հետ միասին ծրագրել և իրականացրել են ագրեսիայի ակտ, որի գործողությունները սկսել են հուլիսի 29-ից, երբ Ադրբեջանում Թուրքիայի հետ համատեղ զորավարժություններ էին իրականացնում, որոնք տևել էին մինչև օգոստոսի 10-ը։

Նրա խոսքով, փաստական տվյալների համաձայն, զորավարժություններից հետո Թուրքիայի մեծաթիվ զինվորականներ, նաև բարձրաստիճան սպաներ, շարունակել են մնալ Ադրբեջանում՝ համատեղ կազմակերպելով Ադրբեջանի զինված ուժերի համակարգումը և տեղերում շարունակելով իրականացնել մարտական պատրաստության աշխատանքները։

Ռ. Վարդանյանն ասաց, որ Ադրբեջանի և Թուրքիայի ռազմաքաղաքական ղեկավարության գործողությունների նախապես ծրագրման մասին է վկայում նաև վարույթն իրականացնող մարմնի կողմից ձեռք բերված փաստական տվյալներն առ այն, որ մինչև բուն ռազմական գործողություններ սկսելը սեպտեմբերի սկզբներին ԶՈւ ծառայողներին կոնկրետ հրաման է տրվել պատրաստվել պատերազմի Արցախի Հանրապետության դեմ։

«Սեպտեմբերի կեսերից արդեն Ադրբեջանում կազմակերպվել և իրականացվել է մեծամասշտաբ զորահավաք։ Կարևոր է փաստել, որ Թուրքիայից ժամանած բարձրաստիճան զինվորականները զորամասերում անձամբ են իրականացրել և համակարգել մարտական պատրաստության դասընթացները», - ասաց ՔԿ պաշտոնյան։

Նա նշեց, որ Ադրբեջանը շփման գծին հարող, Ադրբեջանի խաղաղ, խիտ բնակեցված բնակավայրերում՝ անմիջապես քաղաքացիական բնակիչների տների բակերում, տեղակայվել են հրթիռահրետանային կայաններ: 

Ռ. Վարդանյանի խոսքով, մինչև սեպտեմբերի 27-ը ու դրանից հետո շարունակաբար Ադրբեջանի Զինված ուժերը համալրվել են Իսրայելից, Թուրքիայից, Չեխիայից, Բելառուսից և այլ պետություններից ձեռք բերված ռազմական տեխնիկայով:

Խոսելով պատերազմական գործողություններում վարձկանների ներգրվման մասին, Ռ.Վարդանյանն ասաց, որ նախ Թուրքիայից Վրաստան-Ադրբեջան օդուղով Ադրբեջան են տեղափոխվել շուրջ 1000 թուրք զինծառայողներ։

Սեպտեմբերի 28-ին տվյալներ են ձեռք բերվել տվյալներ այլ երկրներից բերված իսլամիտ գրոհայինների ու ռազմական գործողություններում ներգրավածության վերաբերյալ, տվյալներ են ձեռք բերվել ՊԲ պահպանության գոտու լեռնային հատվածներում արաբալեզու զինյալների առկայության մասին, որոնք  ներգրաված են եղել դիվերսիոն ներթափանցման խնդիրերի իրականացմանը, վերջինների տեղաշարժն իրականացվել է թուրքական արտադրության «Կոբրա» տեսակի թեթև զրահամեքենաներով։

Նշվեց նաև, որ Իրանի և Արցախի սահմանամերձ գոտիներում, մասնավորապես, Հորադիզի մոտակայքում, նկատվել են Սիրիայից տեղափոխված գրոհայինների խմբեր։

Սեպտեմբերի 29-ին հաստատվել է արաբալեզու առնվազն 300 գրոհայինների մասնակցությունն  արևելյան օպերացիոն ուղղությամբ ընթացող մարտական գործողություններին։ Ըստ ՔԿ պաշտոնյայի, վերջինները գործել են անկախ, առանձնացված խմբերով, առանձին խնդիրներով, ապահովել են Ադրբեջանի ԶՈւ ստորաբաժանումների գործողությունները։ Սպասվել է ևս 800 գրոհայիների տեղափոխում Սիրիայից Ադրբեջան։

Ռ. Վարդանյանի խոսքով, հաստատվել է նաև թուրքմեն գրոհայինների, պակիստանցի վարձկանների մասնակցությունը մարտական գործողություններին։

Ըստ նրա, հոկտեմբեր 4-ին Գյանջայում են գտնվել Թուրքիայի ԶՈւ հատուկ նշանակության ստորաբաժանումների առնվազն 300 զինծառայողներ։

Հոկտեմբերի 4-ին սիրիացի զինյալները քողարկվել են Ադրբեջանի սահմանապահ զորքերի համազգեսստով։ Նույն օրը Թուրքիայից Ադրբեջան է ժամանել նաև Թուրքիայի ԶՈւ 400 զինծառայող  քաղաքացիական հագուստով։

Նա նշեց, որ փաստական տվյալները բազմաթիվ են, ամենօրյա ռեժիմով ստացվել են՝  համագործակցելով ԱԱԾ և պաշտպանության նախարարության համապատասխան ստորաբաժանումների հետ։ 

Ռ.Վարդանյանն ասաց, որ Ադրբեջանի զինված ուժերի կողմից ականանետային, հրթիռահրետանային միջոցների, ավիացիոն և ԱԹՍ կիրառմամբ համակարգված, կանխամտածված, նպատակաուղղված գրոհայինների թիրարխ են դարձել Արցախի ավելի քան 120 քաղաքացիական բնակավայրերի խաղաղ բնակչություն։ Ադրբեջանի ԶՈւ կողմից կիրառվել են միջազգային իրավունքի նորմերով արգելված զինատեսակներ, այդ թվում կասետային ռազմամթերք։

Սեպտեմբերի 27-ից մինչև օրս զոհվել է ռազմական գործողություններին որևէ մասնակցության չունեցող  39  խաղաղ բնակիչ։ Զոհվածներից մեկը մանկահասակ աղջիկ է, 6-ը՝ կին։ Տարբեր աստիճանի մարմնական վնասվածք են ստացել 114 խաղաղ բնակիչներ, այդ թվում 80-ից ավելին՝ ծանր մարմնական վնասվածքներ։

Նա նշեց, որ մասնագիտական գործունեություն իրականացնող լրագրողների թիրախավորումը կրում էր միտումնավոր և հետևողական բնույթ Ադրբեջանի զինված ուժերի և ռազմաքաղաքական ղեկավարության կողմից։ Նշված դեպքերը քննության առարկա են դարձել։

Ռաֆայել Վարդանյանը հայտնեց, որ ստացված փաստերը ներկայացնում են ՄԻԵԴ, այժմ քննարկվում է միջազգային քրեական դատարան դիմելու հարցը։ Նա նաև նշեց, որ սա քննարկվել է Քննչական կոմիտեում։

«Պետք է ձեռնարկենք բոլոր միջոցառումները, որպեսզի հնարավոր միջազգային բոլոր ատյաններ ներկայացված փաստական տվյալների հիման վրա լինի համարժեք քրեական պատասխանատվություն և պատիժ»,- ասաց ՔԿ պաշտոնյան։

Ռ.Վարդանյանը հայտնեց, որ բոլոր դեպքերի առիթով ՀՀ Քննչական կոմիտեի քրեագիտական վարչությունում հարուցվել է  քրեական գործ Ադրբեջանի ռազմաքաղաքական ղեկավարության կողմից Արցախի և առանձին գործ՝ Հայաստանի դեմ  ագրեսիվ պատերազմ սանձազերծելու և վարելու, վարձկանության, ռազմական գործողություններում միջազգային պայմանագրով արգելված միջոցներ և մեթոդներ կիրառելու, զինված ընդհարումների ժամանակ միջազգային մարդասիրական  իրավունքի լուրջ խախտումներ կատարելու, հանցավոր հրաման արձակելու, միջազգային ահաբեկչության առերևույթ հանցագործության փաստերի առթիվ։