Ձեր վստահելի աղբյուրը

ՀՀ Պաշտպանության նախարարությունն ու  ՀՀ Զինված ուժերի Գլխավոր շտաբը տարածել են համատեղ հայտարարություն, որտեղ ասված է.

«ՀՀ պաշտպանության նախարարությունը և զինված ուժերի գլխավոր շտաբը խստորեն դատապարտում են Հայաստանի Հանրապետության քաղաքական ղեկավարության և Զինված ուժերի միջևհակասություններ սերմանելու որոշ քաղաքական շրջանակների փորձերը:

Առավել ևս ռազմական դրության պայմաններում Հայաստանի Զինված ուժերը հավատարիմ են օրենքով նախատեսված աստիճանակարգությանը և շարունակելու են անվերապահորեն կատարել ՀՀ Գերագույն հրամանատարի, Կառավարության և պաշտպանության նախարարի հրամաններն ու որոշումները:

ՀՀ պաշտպանության նախարարությունը և զինված ուժերի գլխավոր շտաբը քաղաքական և մերձքաղաքական շրջանակներին կոչ են անում զերծ մնալ պառակտիչ հայտարարություններից և գործողություններից»։

Նկատենք, որ այս հայտարարությամբ ՊՆ-ն արձագանքում է Հայաստանի նախկին վարչապետ, պաշտպանության նախկին նախարար, «Ղարաբաղ» կոմիտեի համահիմնադիր և կոմիտեի անդամ, Հանրային խորհդի նախկին նախագահ Վազգեն Մանուկյանի հայտարարությանը, որտեղ մասնավորապես ասված էր.

«Այս կառավարությունը պետք է հրաժարական տա՝ բանակին հանձնելով ողջ իշխանությունը, ընդ որում դա պետք է անի կամավոր, առանց ցնցումների, որոնք կարող են կործանարար լինել»։