Ձեր վստահելի աղբյուրը

«Սպասելի էր, որ հրադադարի ռեժիմը չի հաստատվի, քանի որ երկու համանախագահ երկրների միջնորդությունը չընդունվեց ու չընկալվեց, հետևաբար երրորդը նույնպես չէր լինելու»,- Panorama.am-ի հետ զրույցում հայտնեց ռազմական փորձագետ Կարեն Հովհաննիսյանը:

Նա նկատեց, որ  ոչ միայն չի պահպանվում հրադադարը, այլև խաղաղ բնակավայրերն են հրթիռակոծվում, որտեղ կան զոհեր քաղաքացիական անձանց շրջանում:

Կարեն Հովհաննիսյանի խոսքով, հրադադար հաստատելու վերաբերյալ ձեռք բերված պայմանավորվածությունները չպահպանելը կանխատեսելի էր, քանի որ Թուրքիայի և Ադրբեջանի հռետորաբանության մեջ այն միֆն է գերիշխում, որ այս պատերազմի միջոցով կարող են լուծել Արցախի հարցը:

Փորձագետը նկատեց, որ մեզ համար չպետք է նորություն լինի նաև Հայաստանի Հանրապետության սահմանների նկատմամբ այսօրվա ոտնձգությունը, որովհետև պատերազմի առաջին օրերից եղել են նման դեպքեր: Նա հիշատակեց Վարդենիսի դեպքերը, որտեղ նաև խաղաղ բնակիչ զոհվեց, տների վրա ԱԹՍ-ներ ընկան:

«Մյուս կողմից էլ, եթե դիտարկենք, որ հարձակում է եղել արդեն հարավային սահմանապահ ուղեկալի վրա, ապա սա արդեն նոր որակ է և այն արդեն այլ ուղղությամբ է տանում ամեն ինչ: Որովհետեև, այդ ուղղության վրա, նույնիսկ եթե Իրանի տարածքում է ընկել հրթիռը և պատճառաբանել են, որ սխալմունք էր եղել, ապա այստեղ այն արդեն սխալմունք չէ և Հայաստանի Հանրապետությունն արդեն պետք է օգտագործի իր ողջ ներուժը, որպեսզի արժանի հակահարված տա: Ինչու չէ, նաև պետք է ՌԴ-ին դիմի, քանի որ նրա հետ բազմաթիվ համաձայնագրեր կան կնքած, որոնք հստակ ասում են, թե որ դեպքում  է ռազմական շրջանակներում Ռուսաստանը Հայաստանի հետ համագործակցելու: Այնպես որ՝ այս առումով բոլորովին այլ իրողության ենք այլևս բախվում»,- հայտնեց ռազմական փորձագետ Կարեն Հովհաննիսյանը: