Ձեր վստահելի աղբյուրը

-Էսի լոռեցի ա։ Տանկ ա խոսք տվել, որ զարկի,- անտառ այցելած «Հետք»-ի խմբագրին կամավորներից մեկին ներկայացնում են ընկերները։

-Արաաա՜, սամալյոտ էլ տեմ վեր գցիլ, հըլա ո՜ւր ես,- արձագանքում է նա։

Անտառում հարմար տեղավորվել են նրանք։ Վրաններում ամեն բան ունեն։

-Էս փաստորեն տնից փախել եք բոլորդ,- նկատում է խմբագիրը։

-Այ ցավդ տանեմ, մեր ապրանքը ջերմոցների մեջ փչանում է, թողել եկել ենք։ Զվարթնոցում լիզիանտուս ենք աճեցնում,- վրա է բերում կամավորն ու ներկայանում. «Աղվան Բաղդասարյան, նախկինում չդատված»։

-Մի բուկետ բերեիր Ալիևի համար,- ասում է մյուսն ու սկսում են ծիծաղել։

Արամավիրի Լենուղի գյուղից եկած եզդի հողագործն էլ կրակի վրա տաքացող ճաշն է գովում, ցույց տալիս գույնը, միսն ու կարտոֆիլը, ասում է՝ ուրախ է, որ նման ընկերների հետ է՝ Վոլոդյա Ավետիսյանի հրամանատարությամբ։

-Բիբար եմ մշակում, ծիծակ, կարմիր բիբար, պերեցի պետք լինի, կգաք մոտս, մատչելի գներով կտամ,-օգտվելով գովազդի հնարավորությունից՝ կատակում է նա։

Կամավորների մեջ միակ կինն էլ խոստովանում է՝ ծաղիկներից է ուրախանում։

Տեսանյութը՝  «Հետք»-ի։