Ձեր վստահելի աղբյուրը

«Ի ուրախություն բոլորիս, պետք է նշեմ, որ բանկերն ու վարկային կազմակերպությունները պատրաստակամ են իրապես օգտվել այս գործիքի ընձեռած հնարավորություններից և առավելագույն մեծ ծավալով վարկային պարտավորություններ ներել»,- մամուլի ասուլիսում հայտնեց Ֆինանսների նախարարի տեղակալ Արման Պողոսյանը՝ ներկայացնելով զոհվածների, անհայտ կորածների և հաշմանդամների վարկային պարտավորությունները ներելու հնարավորություն ընձեռող օրենքի նախագիծը:

Փոխնախարարը նկատեց, որ դրանում համոզվել է ֆինանսական կառույցների հետ ամենօրյա շփումների արդյունքոմ:

Արման Պողոսյանը տեղեկացրեց, որ օրենքն արդեն ուժի մեջ է մտել և համապատասխան կարգավիճակ ունեցող քաղաքացիները կարող են դիմել բանկերին և վարկային կազմակերպություններին:

Նրա խոսքով, օրենքով դիմումների համար միասնական փաստաթղթավորումը չի սահմանվել, այն թողնված է  բանկերի և ֆինանսական կազմակերպությունների հայեցողությանը: Վերջիններս կարող են միայն պահանջել համապատասխան փաստաթղթեր վարկառուի և նրա հետ փոխկապակցված անձանց կարգավիճակի մասին:

Փոխնախարարը հայտնեց, որ պետական կառավարման մարմինները պետք է լինեն առավելագույնս օպերատիվ՝  սեղմ ժամկետներում այդ արտոնությունից օգտվելու համար համապատասխան կարգավիճակի փաստաթղթերը քաղաքացուն տրամադրելու համրցում:

Պատասխանելով հարցին, թե արդյոք օրենքով կարգավորվելու է ռազմաճակատում գտնվող վարկառուի տոկոսադրույքների չվճարման կամ ուշացման խնդիրը՝ Արման Պողոսյանը նկատեց, որ պետությունը չի կարող նման միջնորդություն անել, բայց պատերազմի հենց սկզբից բանկերն ու վարկային կազմակերպությունները սեփական նախաձեռնությամբ հայտարարել էին ի օգուտ վարկառուի այդ խնդրի կարգավորման իրենց պատրաստակամության մասին: