Ձեր վստահելի աղբյուրը

«Այսօր արդեն մեկ ամսից ավել էի, ինչ Ադրբեջանը շարունակում է իր լայնամասշտաբ ագրեսիան Արցախի ժողովրդի դեմ, որի ժամանակ առանձնահատուկ թիրախավորվում են Արցախի բնակչությունը, քաղաքացիական ենթակառուցվածքները, մասնավորապես՝ կենսական ենթակառուցվածքները»,- Հայկական միասնական կենտրոնում կայացած ասուլիսում ասաց ՀՀ ԱԳՆ խոսնակ Աննա Նաղդալյանը։

Նրա խոսքով, Արցախի դեմ ադրբեջանական ագրեսիայի հետևանքով մեծ վնասներ են պատճառվել Արցախի բնակչությանը, Արցախի ՄԻՊ կողմից հրապարակվել է ավելի քան 40  խաղաղ բնակչի շրջանում զոհերի մասին, ավելի քան 120 վիրավոր կա, մեծ մասը ծանր վիրավորում են ստացել։ Եղել են տվյալներ քաղաքացիական ենթակառուցվածքների ավերման մասին, նշվում է 12 հազար մասնավոր սեփականության, մոտ 2100 ենթակառուցվածքների մասին, մեծ մասը կենսական նշանակության ենթակառուցվածքներ են։

Ա. Նաղդալյանն ասաց, որ Ադրբեջանի այս գործողությունները, որոնք մարդկության դեմ ոճիրներ են  պարունակում, խստորեն հակադարձվել են Արցախի կողմից իր ողջ կարողությունների շրջանակներում։

«Ինչպես Ադրբեջանի նախագահի նախկին հայտարարությունները, այնպես էլ Ադրբեջանի ԶՈւ գործողությունները ցույց են տալիս, որ Ադրբեջանի նպատակն է հայաթափել Արցախը, բնաջնջել Արցախի բնիկ ժողովրդին, Ադրբեջանը Արցախը ցանկանում է առանց իր բնիկ ժողովրդի: Արցախի հայ բնակչության գոյությունը հնարավոր չէ Ադրբեջանի իրավասության ներքո»,- ընդգծեց ԱԳՆ խոսնակը:

Նրա խոսքով, Արցախի դեմ լայնամասշտաբ ագրեսիայի առաջին օրվանից Ադրբեջանի գործողություններն ուղեկցվել են պատերազմական կանոնների և միջազգային մարդասիրական  իրավունքի կոպիտ խախտումերով։

«Ադրբեջանի կողմից հրետակոծություններն իրականացվել են միջազգայնորեն արգելված, առաջին հերթին կասետային  զինատեսակով, հիմնական նպատակն է առավել մեծ վնաս հասցնել խաղաղ բնակչությանը, հատկապես առաջնագծից հեռու գտնվող երեխաներին, կանանց։ Ժնևյան կոնվենցիայի խախտման դեպքեր են արձանագրվել Հադրութում, տեսել ենք գերեվարված անձնաց նկատմամբ հաշվեհարդարի իրականացումը»,- ասաց Ա. Նաղդալյանը։

Նրա խոսքով, Ադրբեջանի Զինված ուժերը հիմնովին ավիրում են ժամանակավորապես իրենց վերահսկողության տակ հայտնված բնակավայրերը, ինչի հիմնական նպատակն է հետագայում կանխարգելել բնիկ ժողովրդի վերադարձն իրենց բնակության վայր։

Հարցին՝ տեղեկություններ շրջանառվեցին, որ Իսրայելը մարդասիրական օգնություն է առաջարկել Հայաստանին,  ինչ դիրքորոշում ունե՞ք այս հարցի առնչությամբ, ՀՀ ԱԳՆ խոսնակը պատասխանեց. «Կարևոր ենք համարում, որ Իսրայելը դադարեցնի զենքի վաճառքը Ադրբեջանին։ Նախևառաջ պետք է դադարեցնել Ադրբեջանին զինումը և նրա ռազմական կարողությունների ամրապնդումը, որոնք օգտագործում են խաղաղ բնակչության դեմ։  Մենք ունենք մի իրողություն, երբ ցեղասպանություն վերապրած պետությունը աջակցում է ցեղասպան նկրտումներ դրսևորող և ահաբեկչություն ֆինանսավորող այլ պետություններին»։

Աննա Նաղդալյանը նաև ասաց, որ Իրանը Հայաստանի հարևան երկիրն է, և Ադրբեջանի կողմից Թուրքիայի աջակցությամբ և ահաբեկիչների տարածաշրջան ներմուծմամբ Արցախի դեմ իրականացվող ագրեսիան, ինչպես նաև Ադրբեջանի իշխանությունների՝ թուրքական ազդեցության գոտի և ահաբեկչության կենտրոն դառնալու որոշումը սպառնալիք է ողջ տարածաշրջանի երկրների համար, և այդ առումով Իրանը նույնպես բացառություն չէ: