Ձեր վստահելի աղբյուրը

 Հայաստանը միշտ աջակցել է հրադադարի ռեժիմի պահպանման  գաղափարին, որն առաջարկվել է ԵԱՀԿ Մինսկի խմբի համանախագահների կողմից 2016-ի ապրիլին սրացումից հետո: Այս մասին  «Ռիա նովոստի»-ին տված հարցազրույցում  ասել է Հայաստանի արտգործնախարար Զոհրաբ Մնացականյանը։

«Հայաստանն ու Ադրբեջանը պայմանավորվել են ընդլայնել ԵԱՀԿ նախագահող երկրի հատուկ ներկայացուցչի դիտորդական խումբը և ստեղծել մեխանիզմ հրադադարի ռեժիմի խախտումների դեպքերը հետաքննելու համար: Սակայն այդ ժամանակ Ադրբեջանը հրաժարվեց կատարել այդ պայմանավորվածությունները:

Սա մեկ անգամ ևս ցույց է տալիս, որ ո՛չ երեկ, ո՛չ էլ այսօր Ադրբեջանը շահագրգռված չէ կայուն և վերհսկելի  հրադադարի ռեժիմով: Բայց մեր տեսակետը չի փոխվել, և մենք աջակցում ենք դիտորդների ներգրավմանը»,-ասել է Մնացականյանը։

Շարունակելով դիտարկումները նախարարն ընդգծել է, որ  ԵԱՀԿ Մինսկի խումբը Լեռնային Ղարաբաղի ճգնաժամի կարգավորման միակ համաձայնեցված ձևաչափն է: 

«Իրանը շատ կարոր երկիր է մեր տարածաշրջանում, և, ի տարբերություն Թուրքիայի, այն պատասխանատու և կառուցողական դիրքորոշում է որդեգրում, երբ խոսքը տարածաշրջանային անվտանգության ու խաղաղության մասին է: Միևնույն ժամանակ, Մինսկի խմբի համանախագահները միջնորդության և բանակցությունների համար միջազգայնորեն համաձայնեցված միակ ձևաչափն են, ում դերը վերահաստատվել էր հոկտեմբերի 10-ի համատեղ հայտարարությունում և հոկտեմբերի 17-ի ու 25-ի հետագա հայտարարություններում»,- ասել է ՀՀ ԱԳ նախարարը:

Լեռնային Ղարաբաղի կարգավորման գործընթացի այս փուլում ՀԱՊԿ-ի մասնակցության անհրաժեշտության մասին հարցին ի պատասխան նախարարը նշել է․

«Հայաստանը շարունակում է սերտ խորհրդակցությունները ինչպես ՀԱՊԿ-ի, այնպես էլ առանձին` ՀԱՊԿ անդամ երկրների հետ, եւ իր դաշնակիցներին տեղեկացնում է «գետնի վրա» իրավիճակի մասին»։