Ձեր վստահելի աղբյուրը

Հայաստանում կորոնավիրուսային հիվանդության տարածման պահից  առողջապահության նախարարությունն  իրավիճակի մասին տվյալներ ներկայացնելիս՝ հաղորդում էր նաև վարակից մահացած անձանց սեռն ու տարիքը։

Սակայն արդեն երկու օր է տվյալները ներկայացնելիս մահացածների սեռն ու տարիքը չի նշվում։ Panorama.am-ը դիմեց առողջապահության նախարարություն՝  մեկնաբանություն ստանալու, թե ինչով է պայմանավորված կոնկրետ այդ տվյալների չհաղորդումը։

ԱՆ մամուլի խոսնակ Ալինա Նիկողոսյանն ասաց, որ  այս փուլում ուղղակի նպատակահարամար չէ տարիք, սեռ, ուղեկցող հիվանդություններ նշել։

«Հավաքվում է  այդ ամենը,  անհրաժեշտության դեպքում, ոչ հիմա,  կտրամադրվի այդ տվյալները»,- նշեց նա։

Կորոնավիրուսի մասին վերջին հրապարակումներից Panorama.am-ը նկատել էր, որ կա վիրուսից մահացողների տարիքի նվազում՝ կորոնավիրուսը «ջահելացել է»։ Սակայն մեր այս հարցին առողջապահության նախարարության «Հիվանդությունների վերահսկման և կանխարգելման ազգային կենտրոնի» գլխավոր տնօրենի տեղակալ Գայանե Սահակյանն պատասխանել էր. «Տարբերություն չունենք, նույն միտումը շարունակվում է, մահերն առավելապես գրանցում է 70-ից բարձր անձանց շրջանում, հիվանդությունը՝ 49-65 ու 65-ից բարձր տարիքի անձնաց շրջանում: Այս  տարիքային դրսևորումն ունեցել ենք նաև նախորդ ժամանակաշարջանում»։

Իսկ հիմա այսպես՝ ընդհանրապես սկսեցին մահացածների տարիքը չհրապարակել։