Ձեր վստահելի աղբյուրը

«Այսօր ամբողջ օրը՝ վաղ առավոտից, Ադրբեջանի ԶՈւ-ն ահաբեկչական խմբավորումների հետ միասին ռազմաճակատի գրեթե ողջ երկայնքով շարունակել են հարձակողական գործողությունները»,- Հայկական միասնական տեղեկատվական կենտրոնում կայացած  ճեպազրույցում ասաց ՀՀ պաշտպանության նախարարության ներկայացուցիչ Արծրուն Հովհաննիսյանը։

Նա նշեց, որ մարտերի ինտենսիվությունը շատ բարձր չի եղել, սակայն որոշ օջախային ուղղություններում, առանձին ուղղություններում ընթացել են ինտենսիվ հարձակվողական գործողություններ:

Ա. Հովհաննիսյանի խոսքով, մասնավորապես, կենտրոնական ուղղությամբ մեկ-երկու դիրքերի վրա նետելով մեծաքանակ հետևականային և այլ ուժեր, զրահատեխնիկա,  օգտագործելով հրետանի, ընդ որում՝ միաժամանակ, հրետակոծելով Մարտունի քաղաքը,  Ադրբեջանի ԶՈւ-ին հաջողվել է ունենալ որոշակի առաջխաղացում, որոշակի դիրքային փոփոխություններ։

«Դրան հակառակ  հարավային և հարավ-արևելյան ուղղություններում ընթացող առանձին օջախային մարտերում մեր Զինված ուժերը կարողացել են հակառակորդից հետ վերցնել որոշակի դիրքեր, ապահովել որոշակի առաջխաղացում»,- ասաց ՊՆ ներկայացուցիչը։

Նա նշեց, որ ընդհանուր առմամբ, այս պահի դրությամբ էլ մարտերը շարունակվում են. «Մեծ ինտենսիվություն չունեն, սակայն սակայն զորատեսակային և զինատեսակային առումով կիրառվում են բավականին շատ զենքեր և զինատեսակներ»։

Ինչ վերաբերում է հարցին, թե ո՞ր դեպքում կարող է հրադադարը հաստատվել,  նա պատասխանեց. «Կուզենայի առաջին հերթին ֆիքսել մի բան, որ ինչ էլ բանակցեն, ինչ էլ պայմանավորվեն, մինչև չլինեն վերիֆիկացիայի լիարժեք մեխանիզմներ, որոնց վերաբերյալ հարցադրումներ և առաջարկներ մեր ԶՈւ-ն սեղմ ժամկետում մշակում են, որևէ լիարժեք հրադադար լինել չի կարող»։

Ըստ նրա, շատ առարկայական է, որ նշվեն, ունենան այն մեխանիզմները, որոնցով հնարավոր է վերահսկել հրադադարը և տեսնել խախտողին, ինչու չէ, նաև ի սկզբանե ֆիքսել, որ պատերազմը սկսել է Ադրբեջանը, որ ագրեսիան սկսել է Ադրբեջանը:

«Մի ամիս և մի քանի օր արդեն շարունակվում է պատերազմը, կարծես բոլորի ուշադրությունից դուրս է մնացել, թե ինչպես սկսվեց այս պատերազմը, և սա շատ կարևոր է ֆիքսել»,- նշեց Ա. Հովհաննիսյանը։

Հարցին՝ կարո՞ղ եք մանրամասներ ներկայացնել Ադրբեջանի կողմից ֆոսֆորային զենքի կիրառման վերաբերյալ, արդյո՞ք կան տուծաժներ, նա պատասխանեց. «Ինչպես ՊԲ-ն արդեն հայտնել է, ուսումնասիրվում են ֆոսֆորային զինատեսակների կիրառության դեպքերը և հետևանքները: Դրանք ամբողջացնելու պարագայում մենք կներկայացնենք:

Սակայն, օգտվելով առիթից, կուզենայի նորից փաստել, որ նախ այսօր առավոտյան Ստեփանակերտ քաղաքի ուղղությամբ, օրվա ընթացքում Մարտունի քաղաքի ուղղությամբ, Ադրբեջանի ԶՈւ-ն կիրառել են հրետանային և հրթիռային միջոցներ, ավիացիա խաղաղ բնակչությանը ռմբակոծելու համար: Ուզում եմ բոլորի ուշադրությունը հրավիրել այս փաստի վրա և, քանի որ մեզ տեսնում է նաև աշխարհը, ֆիքսել, որ Ադրբեջանը ընտրովի, շատ հաճախ գերճշգրիտ զինատեսակներից հարվածներ է հասցնում խաղաղ բնակչությանը»։

Անդրադառնալով Ադրբեջանի հայտարարությանը, թե Հայաստանում գտնվողը ահաբեկիչ չէ, այլ բեմադրություն է, Ա. Հովհաննիսյանն ասաց. «Զարմանալի կլիներ, որ այլ բան հայտնեին Ադրբեջանում։
Ես նշել եմ, որ պարոն Հաջիևին հետաքրքիր անակնկալներ են սպասվում ոչ միայն այս ահաբեկչի կապակցությամբ: Թե այս ահաբեկչի, թե այլ ահաբեկիչների առկայության, օգտագործման, և մարտավարությունը, թե ինչպես են ահաբեկիչներին կիրառում, որտեղ են կիրառում, ինչ խնդիր են լուծում, ինչպես են եկել, հասել Ադրբեջան, այդ ամենի առնչությամբ բավականին հետաքրքիր անակնկալներ են սպասվում պարոն Հաջիևեին և ադրբեջանցիներին»։