Ձեր վստահելի աղբյուրը

Հայաստանում ՄԱԿ-ի մշտական համակարգող Շոմբի Շարփը ֆեյսբուքյան իր էջում կիսվել է Հանրային ռադիոյի՝ Ադրբեջանի կողմից Արցախի քաղաքացիների նկատմամբ արգելված ֆոսֆորային զինամթերք կիրառելու անթույլատրելիության մասին ՄԻՊ ահազանգի վերաբերյալ  հրապարակմամբ։ 

Նա որևէ մեկնաբանություն չի ավելացրել։

Նկատենք, որ մինչ այժմ Շարփի գործողությունները սահմանափակվել են Ադրբեջանի ագրեսիայի հետևանքով վիրավորված երեխաներին այցելելով, բայց դրան նախորդել էին ՄԱԿ-ի հայաստանյան գրասենյակի դիմաց իրականացրած ակցիաները։

Հիշյալ հրապարակման մեջ  Հայաստանի ՄԻՊ Արման Թաթոյանն ընդգծել էր, որ ֆոսֆորային զենքի օգտագործման հնարավոր վտանգներն ու հետևանքները, նշել, որ անտառները, որոնց նկատմամբ կիրառվել են այս նյութերը, գտնվում են քաղաքացիական բնակավայրերի հարևանությամբ (այս պահի տվյալներով՝ Շուշիի, Մարտակերտի, Ասկերանի շրջաններ), անտառներում ադրբեջանական զինված հարձակումներից պատսպարվում են նաև խաղաղ բնակիչներ:

Արցախի ՄԻՊ արտակ Բեգլարյանը պատերազմի մեկնարկից ի վեր կոչ է անում միջազգային կառույցներին, միջազգային հանրությանը՝ կույր չլինել, դադարել խոսել ու սկսկել գործել։

Հայաստանում բազմաթիվ ակցիաներ են իրականացվել դեսպանությունների, միջազգային կազմակերպությունների գրասենյակների դիմաց՝ Արցախի անկախության ճանաչման ու Ադրբեջանի, Թուրքիայի ահաբեկչական գործողությունների դադարեցման պահանջով։

Ավելին, հոկտեմբերի 30-ին Հայաստանի ու Արցախի մարդու իրավունքների պաշտպաններն Արցախ այցի համատեղ հրավերներ են ուղարկել Հայաստանում հավատարմագրված դիվանագիտական ներկայացուցչություններին և միջազգային կազմակերպություններին՝  իրավասու մարմիններին հետ սերտ համակարգմամբ երաշխավորելով նրանց անվտանգությունն ու այցի բացառապես մարդասիրական բնույթը։

Հրավերի նպատակն է Հայաստանում ներկայացված միջազգային բոլոր գործընկերներին ցույց տալ ադրբեջանական զինված ուժերի վայրագությունները խաղաղ բնակչության նկատմամբ, խաղաղ բնակավայրերում նրանց կատարած զանգվածային ավերածությունները, արգելված զինատեսակների կիրառության ապացույցները։

Որևէ կազմակերպությունից հրապարակային արձագանք հրավերին մինչ այս պահը չի հնչել։