Ձեր վստահելի աղբյուրը

Այսօր ԱԺ մշտական հանձնաժողովների համատեղ նիստում սկսվեց «Հայաստանի Հանրապետության 2021թ. պետական բյուջեի մասին» ՀՀ օրենքի նախագծի քննարկումները: Նիստը վարող Ֆինանսավարկային և բյուջետային հարցերի մշտական հանձնաժողովի նախագահ Արկադի Խաչատրյանն առաջարկեց մեկ րոպե լռությամբ հարգել ռազմաճակատում զոհվածների հիշատակը:

Դրանից հետո սկսվեց քննարկումը։

«Բյուջեն պետք է արտացոլի կառավարության ծրագրերում ամրագրված նպատակներին հասնելու հնարավոր ուղղությունները, ոլորտային քաղաքականությունների շեշտադրումները, ինչպես նաև ներկա իրավիճակով պայմանավորված մարտահրավերները»,- հայտնեց փոխվարչապետ Մհեր Գրիգորյանը և նկատեց, որ կան նոր իրողություններ և անելիքներ, որպեսզի բյուջեի բալանսում տեղ գտնի ստեղծված իրավիճակը:

Նշենք, որ հանձնաժողովում քննարկվում է օրենքի նախագծի մշակման սկզբունքները և նախագծի հիմքում դրված հիմնական մակրոտնտեսական ցուցանիշները (գնաճի սցենարը, բյուջեի դեֆիցիտը և նրա ծածկույթը, արտաքին և ներքին պարտքը), եկամուտների ձևավորում (հարկային և մաքսային քաղաքականությունը),  բյուջեի ծախսերի կառուցվածքը և ծախսային քաղաքականությունը (սոցիալական հարցերի լուծումը բյուջեում և դոտացիաներ համայնքներին),  բյուջեի կատարման համար անհրաժեշտ օրենսդրական ապահովումը:

«Հայաստանի Հանրապետության 2021թ. պետական բյուջեի մասին» ՀՀ օրենքի նախագծում նախատեսված եկամուտների և ծախսերի մասով ելույթ ունեցավ Ֆինանսների նախարար  Ատոմ Ջանջուղազյանը: 

Նիստում քննարկվելու է նաև օրենքի նախագծի վերաբերյալ ՀՀ կենտրոնական բանկի եզրակացությունը, ինչպես նաև Կենտրոնական բանկի 2021թ. վարչական ծախսերի և կապիտալ ներդրումների նախագիծը: