Ձեր վստահելի աղբյուրը

ՄԱԿ-ի մարդու իրավունքների հարցերով գերագույն հանձնակատար Միշել Բաչալետը մտահոգություն է հայտնել Արցախում զինված հակամարտության ընթացքում բնակելի թաղամասերում տեղի ունեցող անխնա հարձակումների առնչությամբ՝ նախազգուշացնելով, որ նման գործողությունները կարող են իրենցից ռազմական հանցագործություններ ներկայացնել, փոխանցում է «ՏԱՍՍ»-ը՝ հղում տալով Բաչալետի գլխավորած վարչության մամուլի ծառայությունը:

Նշվում է, որ գերագույն հանձնակատարն անհանգստություն է հայտնել Արցախի հակամարտության գոտում և դրա շուրջ բնակելի թաղամասերում անխտիր հարձակումների առնչությամբ, ինչը հակասում է միջազգային մարդասիրական իրավունքին, և նախազգուշացրել է, որ դրանք կարող են ռազմական հանցագործություններ լինել։

Բաչալետը հիշեցրել է հակամարտող կողմերին արվող բազմաթիվ կոչերի մասին՝ ձեռնարկելու բոլոր անհրաժեշտ միջոցները՝ խուսափելու կամ նվազեցնելու մարդկային կորուստները խաղաղ բնակչության շրջանում և քաղաքացիական ենթակառուցվածքներին, այդ թվում՝ դպրոցներին և հիվանդանոցներին վնաս հասցնելը։

«Դրա փոխարեն տներ են ավերվել, փողոցներ են վերածվել ավերակների, իսկ մարդիկ ստիպված են փախուստի դիմել և անվտանգություն փնտրել նկուղներում»,- ասել է Բաչալետը:

Նրա խոսքով, միջազգային իրավունքն արգելում է հարձակումները, որոնք իրականացվում են առանց ընտրության կամ համամասնության սկզբունքի պահպանման: