Ձեր վստահելի աղբյուրը

Արցախցի կանայք այսօր կրկին հավաքվել են ՀՀ-ում ԱՄՆ դեսպանատան դիմաց: Նրանք նշում են, որ տաս օրից ավելի է իրենց առձեռն փոխանցած, նաև էլեկտրոնային հասեցով ուղարկված նամակներին պատասխան չկա:

«Չեմ հասկանում, թե սա ինչ վերաբերմունք է այն մարդկանց նկատմամբ, ովքեր թողել են իրենց տունը, հայրենիքը, իրենց կռվող հայրերին, եղբայրներին, ամուսիններին, փախել են Երևան: Գոնե հարգանք ունեցեք, ներկայացեք այստեղ, ուժ ունեցեք ձեր մեջ ու 10 րոպե նայեք մեր հայացքների մեջ, 10 րոպե ապրեք այն մղձավանջը, ինչ մենք ենք ապրում 30 օրից ավելի»,- ասաց ակցիայի մասնակիցներից, «Արցախի կանանց նախաձեռնող խմբի» անդամ Իրինա Սաֆարյանը։

Նրանք պահանջում են հանդիպում ՀՀ-ում ԱՄՆ դեպսանի հետ, պահանջում են Արցախի ճանաչում:

«Վերջ տվեք Ադրբեջանի ու Թուրքիայի ցեղասպան քաղաքականությանը, վերջ տվեք այն ամենին, ինչ կատարվում է Արցախում»,- նշում է ակցիայի մասնակիցը:

«Արցախի կանանց նախաձեռնող խմբի» անդամ Սիրանուշ Սարգսյանի խոսքով, իրենց հայրերն ու ամուսինները ոչնչացնելու են տեռորիստներին, սակայն նրանց սերմերը դուրս են գալու ու հասնելու մինչև Վրաստան, Ռուսաստան, Եվրոպա ու Ամերիկա. «Մենք մեր թշնամուն ոչնչացնելու ենք, իսկ պտուղները դուք եք քաղելու, ամոթ ձեզ, որ թույլ եք տալիս այդ ամեն ինչը»:

«Արցախի կանանց նախաձեռնող խմբի» անդամ Լիանա Ադամյանը հայտնեց, որ եկել են այստեղ իրենց նամակի հետքերով, նաև նոր նամակ են հանձնելու:

«Ես 18 տարեկան Միշա Մարտիրոսյանն եմ, գերի եմ, անմարդկային կտտանքների եմ ենթարկվում, չգիտեմ՝ կվերադառնամ տուն, թե ոչ:

Ես Էրիկ Վարունցն եմ, որ միջազգայնորեն արգելված զենքների կիրառումից հետո երեք օր սղոսկելով հաշմանդմություն ստանալով հասել եմ հայկական դիրքեր:

Ես… բոլոր զոհված ու վիրավոր հայ քաջերն եմ այսօր, կրում եմ այդ ցավն իմ վրա, իմ հոգում, իմ պատմության մեջ: Բայց եկել եմ ասել, որ ապագա զինվորի մայր եմ, չեմ հանդուրժելու, չենք լռելու որքան էլ խուլ, համր ձևանաք: Մենք աղաղակելու ենք ավելի բարձր: Ինչո՞վ եք զբաղված այս մեկ շաբաթը»,- ասաց Լ. Ադամյանը:

Նա նշեց, որ պահանջում են դուրս գա անձամբ ՀՀ-ում ԱՄՆ դեսպանը:

Լ. Ադամյանն ասաց, որ այժմ իրենք խաղաղության կոչով գրոհելու են ԱՄՆ դեսպանության օդը, որպեսզի հասկանան, թե ինչ է նշանակում  Ստեփանակերտում, Շուշիում, Մարտունիում, Մարտակերտում և այլ քաղաքներում, գյուղերում  տեղի ունեցող ռմբակոծությունները:

Նրանք թղթից պատրաստված ինքնաթիռներ նետեցին դեպի դեսպանություն:

«Կարմիրը նշանակում է մեր արյունը, որը մեջ թաթախված եք դուք ձեր լռությամբ»,- ասաց նա:

Այնուհետև ակցիայից մասնակիցներից մի քանիսը մտան դեսպանություն՝ նշելով, որ գնում են հանդիպման: 

Որոշ ժամանակ անց Լիանա Ադամյանն ասաց, որ իրենց փոխանցեցին՝ դեսպան տիկին Լին Թրեյսին տեղում չէ:

«Մնում ենք այստեղ այնքան, մինչ կունենաք հստակ ժամ, օր, որ ընդունելու է մեզ: Մենք պահանջել ենք այսօր»,- նշեց նա: