Ձեր վստահելի աղբյուրը

«Եթե մենք 2020 թվականի համար կանխատեսել էինք ունենալ 7 տրիլիոն 95 մլրդ դրամանոց ՀՆԱ, ապա այժմ ակնհայտ է, որ մոտավորապես 1 տրիլիոնի չափ գերագնահատած ցուցանիշի հետ գործ ունենք, և դա հայաստանյան ֆենոմեն չէ, դա աշխարհի բոլոր երկրներին բնորոշ գործընթաց է»,- այսօր խորհրդարանում 2021 թվականի պետական բյուջեի քննարկման ժամանակ ասաց ՀՀ ֆինանսների նախարար Ատոմ Ջանջուղազյանը։

Նրա խոսքով, այժմ կառավարությունը փորձել է նախագծել այնպիսի ծրագիր, որը կծառայի իր առաքելությանը, որը հնարավորություն կտա արագ վերականգնում ունենալ և ապահովել դրա համար անհրաժեշտ հատկացումների մակարդակը.

«Անորոշության աստիճանը չափազանց բարձր է, բայց այս պայմաններում օգտագործվել են այն տվյալները, այն տեղեկությունները, որոնք հասանելի են եղել։ Օգտագործվել է արդիական լավագույն մեթոդաբանությունը՝ կանխատեսելու թե՛ մակրո, թե՛ բյուջետային շրջանակը։ Նպատակադրվել ենք տնտեսական աճի վերականգնում և պոտենցիալի մեծացում ունենալ»։

Ըստ նախարարի, 2021 թվականի բյուջեի նախագծում 215 մլրդ դրամ է կազմել կապիտալ ծրագրերի համար նախատեսված միջոցների չափը, կամ կանխատեսվող ՀՆԱ-ի 3.2% -ը, ինչը գերազանցում է մեր երկրի պատմական միջին կարողությունը՝ կապիտալ ծախսեր իրականացնելու համար։

«Բացի այդ, մենք ունենք նաև միջանկյալ լուծում 2021 թվականի բյուջեում, որի նման օրինակ ունեցել ենք նաև 2020-ի համար, երբ առանձին հավելվածով առաջարկել ենք կապիտալ ծրագրերի առաջնահերթություններ հանդիսացող ծախսերի ցանկ, որն այս դեպքում նույնպես կիրառել ենք։ Ընթացիկ ծախսերի համար մենք նոր պարտավորությունների հարց չենք քննարկել, այլ կիրառել ենք մոտեցում՝ հաշվի առնելով 2019 թվականի փաստացի ծախսերը, ինչպես նաև 2020 թվականի բյուջեով նախատեսված ցուցանիշները»,- ներկայացրեց ֆինանսների նախարարը։

Ատոմ Ջանջուղազյանը նշեց, որ 2020 թվականի ընթացիկ ծախսերում եղել են էական աճեր,  մարդկային կապիտալում ներդրումների բարելավում է եղել, և 2019 թվականի հետ համեմատած, այս ուղղությամբ ծախսերը եղել են այս բաշխմամբ՝ առողջապահության ոլորտ՝ 22% աճ, ինչը 2021-ին մոտ 2.1%-ով ևս կաճի.

«ԿԳՄՍ ոլորտում իրականացվող ծրագրերի համար հատկացումների աճը 2020-ին նախորդ տարվա հետ համեմատ եղել է 11%, ինչը 2021-ին մոտ 1.2%-ով էլի կաճի։ Աշխատանքի և սոցիալական հարցերի նախարարության կողմից իրականացվող ծրագրերի համար շուրջ 11%-ի աճ է եղել 2019-ի համեմատ։ Եվ 2021-ին նախատեսվում է ևս 2.2% աճ»։

Ինչ վերաբերում է մակրոտնտեսական կանխատեսումներին, ապա ֆինանսների նախարարը հայտնեց՝ ենթադրվում է, որ 2020-ը կավարտվի 4.4% տնտեսական անկմամբ։

«Համավարակի ազդեցությամբ պայմանավորված 2020-ի առաջին կիսամյակում ՀՀ ՀՆԱ-ն կրճատվել է 5.7%-ով։ Հիմնական բացասական ազդեցությունն արձանագրվել է ծառայությունների ոլորտում։ Պահանջարկի նվազումն էլ պայմանավորված է եղել սպառման ու ներդրումների կրճատմամբ։

Տարեսկզբից մեր տնտեսությունում արձանագրված էր անցյալ տարեվերջի լավատեսական սպասմանը համապատասխան զարգացում, և աճի համեմատաբար բարձր տեմպեր էին նկատվում, մինչդեռ մարտ ամսից դրանք կտրուկ դանդաղեցին։ Ամենից խորը տնտեսական անկում ունեցանք ապրիլ ամսին, ինչը որոշակիորեն մեղմվեց մայիսին։ Հուլիս ամսին տնտեսական ակտիվության անկումը կրկին խորացավ, սակայն օգոստոսին նկատվեց դրա մեղմում։ 2020-ի համար կանխատեսվում է տնտեսական աճի բացասական 6% մեծություն, իսկ 2021 թվականի համար այն գնահատված է 4.8%»,- ներկայացրեց Ատոմ Ջանջուղազյանը։