Ձեր վստահելի աղբյուրը

Ուկրաինայի նախագահ Վլադիմիր Զելենսկին հերքել է այն մեղադրանքները, թե իբր Ուկրաինան ֆոսֆորային ռումբեր է մատակարարում Ադրբեջանին: Այս մասին նա գրել է հոկտեմբերի 3-ին՝ իր Telegram ալիքում, հայտնում է Regnum-ը։

Զելենսկին պատասխանել է Ռուսաստանում ապրող ու ստեղծագործող կինոռեժիսոր Սարիկ Անդրեասյանին, որն օրերս բաց նամակ էր հղել Զելենսկուն՝ նրան մեղադրելով Լեռնային Ղարաբաղում պատերազմի ընթացքում հայ երեխաների մահվան մեջ:

Ուկրաինայի նախագահը գրել է, թե Անդրեասյանը հեռարձակում է «ռուսական քարոզչություն»:

«Ուկրաինան երբեք ոչ մի տեղ ֆոսֆորային ռումբեր չի մատակարարել: Ընդհանրապես։ Հատկապես այն վայրերում, որտեղ արդեն թեժ է, և որտեղ արդեն կան շատ թեժ գլուխներ, ովքեր ցանկանում են այնտեղ «աշխարհաքաղաքականորեն» ինչ-որ բան լուծել», - գրել է Զելենսկին:

Ուկրաինայի նախագահը ափսոսանք է հայտնել, որ ռեժիսորը սկսել է հասարակական մեղադրանքներով, այլ ոչ թե իրեն անձամբ հարց տալով:

Զելենսկին նաև կոչ է արել հայերին «հայտնի քարոզչության հետ շփվելուց հետո ավելի հաճախ լվանալ ձեռքերը և ֆեյքեր չտարածել»: Բացի այդ, նա նշել է, որ Անդրեասյանը դեմ չի արտահայտվել Դոնբասում «ռուսական ագրեսիային»: