Ձեր վստահելի աղբյուրը

Կանադայի արտաքին գործերի նախարար Ֆրանսուա-Ֆիլիպ Շամպայնը անդրադարձել է ՄԱԿ-ի մարդու իրավունքների գերագույն հանձնակատար Միշել Բաչելետի՝ Արցախում պատերազմական հանցագործությունների հնարավորության մասին հայտարարությանը։

Միշել Բաչելետը խորը մտահոգություն էր հայտնել Լեռնային Ղարաբաղում և հարակից տարածքներում բնակավայրերի թիրախավորման և միջազգային իրավունքին հակասող միջոցներով գրոհների շարունակման կապակցությամբ, որոնք պատերազմական հանցագործության նշաններ են պարունակում։

«Մենք աջակցում ենք Միշել Բաչելետի՝ քաղաքացիական հարձակումներն ու տառապանքները դադարեցնելու ու միջազգային մարդասիրական օրենսդրությունը խստորեն պահպանելու կոչին»,-թվիթերում գրել է Կանադայի ԱԳ նախարարը։

Հիշեցնենք, որ Միշել Բաչելետը նշել էր, որ ռազմական գործողությունների վերսկսումից ի վեր միջազգային կառույցների ներկայացուցիչները կողմերին բազմիցս կոչ են արել իրագործել անհրաժեշտ միջոցները և հնարավորինս նվազեցնել խաղաղ բնակիչների շրջանում կորուստները և բացառել հարվածները քաղաքացիական օբյեկտների, մասնավորապես՝ դպրոցների ու հիվանդանոցների վրա։

Բաչելետը նաև լուրջ մտահոգություն էր հայտնել ադրբեջանական զորքերի կողմից երկու հայերին գնդակահարման կապակցությամբ, ասելով, որ այն ցույց է տալիս, որ պատերազմական հանցագործություն է կատարվել։

We support @UN Human Rights Chief @mbachelet in her call to end civilian attacks and suffering & for the strict adherence to international humanitarian law. #NagornoKarabakh https://t.co/aNtgBefFqX

— François-Philippe Champagne (FPC)