Ձեր վստահելի աղբյուրը

Մարդու իրավունքների եվրոպական դատարանը (ՄԻԵԴ) կոչ է արել Հայաստանին և Ադրբեջանին հետևել միջազգային նորմերին՝ կապված Լեռնային Ղարաբաղի հակամարտության ընթացքում գերի ընկած անձանց հետ: Ստրասբուրգյան դատարանի համապատասխան հայտարարությունը այսօր ստացել է ՏԱՍՍ-ի փարիզյան գրասենյակը:

Դատարանը նշել է, որ «կոնկրետ բանտարկյալների վերաբերյալ բազմաթիվ բողոքներ է ստացել ինչպես իշխանություններից, այնպես էլ հարազատներից»: Դատարանը խնդրել է երկու երկրների կառավարություններին տեղեկատվություն տրամադրել՝ արդյոք այդ մարդիկ իսկապես գերեվարվել են:

«Եթե այդպես է, դատարանը խնդրում է տեղեկացնել, թե ինչ պայմաններում են նրանք այժմ պահվում, արդյոք անցնում են բուժզննում կամ բուժում», - նշված է հաղորդագրությունում:

ՏԱՍՍ-ի հաղորդմամբ, դատարանը հիշեցնում է զինված հակամարտության ընթացքում գերի ընկած անձանց պաշտպանության միջազգային մեխանիզմների գոյությունը, կոչ է անում երկու կողմերին էլ մասնակցել համապատասխան ընթացակարգերին։

Միևնույն ժամանակ ՄԻԵԴ-ը տեղեկացնում է, որ չի նախատեսում նոր որոշումներ կայացնել Հայաստանի և Ադրբեջանի դեմ միջանկյալ միջոցառումների վերաբերյալ։ Դատարանը հաստատում է արդեն կայացված որոշումները և նոր միջանկյալ միջոցների համար պատճառ չի տեսնում։