Ձեր վստահելի աղբյուրը

«Թուրքիան Արաքս գետի վրա շատ ջրամբարներ է կառուցել, եթե բաց սցենարով նայենք, նա կարող  է ամբողջ գետի հոսքը ձգտեցնել զրոյի՝ ձմեռը ջուրը բաց թողնելով և ամառը հավաքելով ջրամբարներում»,-Աժ մշտական հանձնաժողովների համատեղ նիստում 2021 թվականի բյուջեի քննարկման ժամանակ հայտնեց տարածքային կառավարման և ենթակառուցվածքների նախարարի տեղակալ Վաչե Տերտերյան: Ըստ փոխնախարարի, նման զարգացումների դեպքում Հայաստանը մեծ պրոբլեմ կունենա, քանի որ այդ ուղղությունից 50/50 հարաբերակցությամբ երկու ջրի աղբյու կա՝ Ախուրյան գետը և Արաքսի վրա  Ղարաղալայի ջրահանգույցը: Վաչե Տերտերյանի խոսքով, եթե Արաքսի հատվածից լինի ջրի սակավություն, ապա ամբողջ Արմավիրի մարզը  պետք է անցնի Ախուրյանի ջրի հոսքի օգտագործմանը, որը լուրջ խնդիր կառաջացնի:

Փոխնախարարը հայտնեց, որ այդ դեպքում լուծումը կարող է լինել խորքային հորերի շահագործումը,  որը շատ ցանկալի չէ ոչ միայն ծախսատար լինելու, այլև՝ էկոլոգիական իմաստով:

Տարածքային կառավարման և ենթակառուցվածքների նախարարի տեղակալը  կարևորեց ջրի ամբողջ մակերևութային հոսքի կառավարումը, բայց նկատեց, որ դրա համար անհրաժեշտ են համապատասխան ռեսուրսներ: Վերջինս շեշտեց, որ Թուրքիան էապես բարձրացրել է Արաքսի հոսքի կառավարելիությունը:

Նա պատգամավորներին տեղեկացրեց, որ գործադիրում որոշակի վիճակով կա առնվազն 4 ջրամբարի նախագիծ և պետք է գտնել միջոցներ դրանք իրականացնելու համար:

Նախատեսված ջրամբարներից երկուսը  Սևանի մոտ է, մեկը՝ Թալին-Մաստարա հատվածում և մեկն էլ դրանից  ներքև: Նրա խոսքով, պատեհ առիթի դեպքում կսկսեն շինարարությունը, որը նաև Սևանի հոգսը կթեթևացնի:

Վաչե Տերտերյանը նկատեց, որ հնարավորություն կա դիտարկել նաև Եղվարդի ջրամբարի տարբերակը: