Ձեր վստահելի աղբյուրը

«Այս քառասուն օրերի ընթացքում փորձել ենք մեր կարողացածը կատարել հայրենիքի պաշտպանության համար, բայց դա մեծապես ուղղված է եղել արտաքին աշխարհին ու միջազգային լսարանին»,- այսօր ֆեյսբուքյան ուղիղ եթերում ասաց Արցախի ՄԻՊ Արտակ Բեգլարյանը։

Այնուամենայնիվ, Արցախի ՄԻՊ-ը նշեց, որ նաև տեղում են մարդու իրավունքների պաշտպանությանն ուղղված աշխատանքներ կատարվել։ Աշխատանքներ են տարվել նաև սոցիալական աջակցության, կարիքների բարձրաձայնման, անհայտ կորածների և գերիների խնդիրների վերհանման ուղղությամբ։

«Սակայն մեր աշխատանքների հիմնական մասը եղել է փաստահավաք առաքելությունը, որի շրջանակներում հավաքագրված տեղեկությունների մի մասը դարձել է զեկույց։ Դրանք հիմնականում օտար լեզուներով ներկայացվել են միջազգային հանրության դատին»,- տեղեկացրեց Արտակ Բեգլարյանը, ապա հավելեց, որ բացի այդ արդեն մի քանի հարյուր հարցազրույց է տվել միջազգային և տեղական ԶԼՄ-ներին, ինչպես նաև տարբեր նամակներ ու զանգեր է ունեցել միջազգային կառույցների ներկայացուցիչների հետ։

Արցախի ՄԻՊ-ի խոսքով, հնարավորինս ամեն ինչ արվում է, որպեսզի աշխարհը տեղեկացված լինի, թե ինչ է կատարվում Արցախում, թե ինչ հանցագործություններ է կատարում Ադրբեջանը և թե ինչ վտանգի են ենթարկվում արցախցիները՝ Ադրբեջանի, Թուրքիայի և ահաբեկիչների կողմից։

«Իմ հայտարարությունների հիմնական մասն ուղղված է եղել աշխարհին մեր դիրքորոշումները ներկայացնելուն։ Առ այսօր որոշ չափով հույս եմ ունեցել, որ այդ աշխատանքը արդյունավետ է, որ այն կարծիք է ձևավորում միջազգային հանրությունում և որոշում ընդունողների մոտ։ Բայց ես անընդհատ այն իրականությանն էի բախվում, որ այո, շատ-շատերը հասկանում են մեզ, այո, ցավում են մեր կորուստների ու տառապանքների համար, բայց  ընդամենը մարդկայնորեն։ Երբ հարցը հասնում է որոշումներ կայացնելուն, կամ գործողություններին, այդ ժամանակ մարդկային զգացողությունները, կամ մարդկային իրավունքները էական չեն նրանց համար։

Էական են քաղաքական և տնտեսական շահերը, բայց ոչ արժեքներն ու մարդու իրավունքները։ Ով, առ այսօր մեզ օգնել է, շնորհակալ ենք։ Բայց այդ աջակցությունը բավարար չէ հանցագործությունները կանգնեցնելու և պատասխանատուներին պատժելու համար։ Ամեն դեպքում, այս եզրահանգումը բոլորս պետք է մեր մտքում ունենանք։ Հիմա ես բոլորին ուզում եմ ասել՝ եկեք հույսներս դնենք մեր ու մեր զինվորների վրա, այլապես մենք կկորցնենք ամեն ինչ»,- շեշտեց Արտակ Բեգլարյանը։

Նա նշեց, որ պետք է մտածել սեփական ուժերի վրա հույս դնելու մասին։Արցախի ՄԻՊ-ը հորդորեց՝ աչքերը դեպի դուրս չհառել ու չմտածել, որ կողքից ինչ-որ մեկը պետք է գա և օգնի արցախցիներին՝ պաշտպանել իրենց իրավունքները, տունն ու հայրենիքը.

«Եթե գան, օգնեն, շատ լավ է, բայց չեն գալու օգնեն խնդրանքի հիման վրա։ Քաղաքական շահի հիման վրա են գալու, որ օգնեն։ Իրենք իրենցով, առանց խնդրանքի են գալու օգնեն։ Դրա համար եկեք մի բռունցք դառնանք, եկեք միավորվենք մեր դիրքապահ տղաների շուրջը, նրանց թև ու թիկունք լինենք։ Ով կարող է զենք վերցնել, թող զենք վերցնի ու դիրքը պահի, որ մենք կարողանանք վերջնականապես պաշտպանել մեր իրավունքները և հավերժ ունենալ մեր հայրենիքը, արժանապատվությունն ու խաղաղությունը։ Այլապես մենք կկորցնենք մեր ողջ հայրենիքը, և մեր բոլոր նախկին զրկանքները ուղղակի ջուրը կլցնենք»։