Ձեր վստահելի աղբյուրը

«Ճիշտն ասած, ես այդպես չէի վերաբերվի ու թերագնահատի Հայաստանի աշխարհքաղաքական դիրքերը միջազգային հարաբերություններում, նաև չէի գերագնահատի»,-ԱԺ-ում հայտարարեց ԱԳ նախարար Զոհրաբ Մնացականյանը՝ արձագանքելով «Լուսավոր Հայատան» խմբակցության պատգամավոր Ա. Խաչատրյանի այն հարցին, թե արդյո՞ք բավարար միջոցներ ծախսել ենք, որպեսզի առաջ մղենք Հայաստանի շահերը, գտնեինք համատեղ շահեր աշխարհի ուժային կենտրոններում ու հետաքրքրությունը մեծացնեինք Հայաստանի նկատմամբ։

Նախարար Մնացականյանը նկատեց, յուրաքանչյուր մարդ հասկանում է, թե ինչպես է ձևավորվել աշխարհակարգը։

Ընդդիմադիր քաղաքական ուժի ներկայացուցչի նախարարին ուղղված հաջորդը հարցն էր՝ արդյոք կարծո՞ւմ եք, որ խնայել ենք դիվանագիտության վրա, և եթե չխնայեինք, կունենայի՞նք ավելի շատ դաշնակիցներ մեր կողքին։

Մնացականյանն ի պատասխան հայտարարեց, քննարկումների ընթացքում խնդիրը արտահայտվել է շատ հստակ, գումարն ուղղակի բավարար գործոն չի։

«Եթե համակարգը համապատասխան բարեփոխումների չի ենթարկվում ու համապատասխան իրական ծրագրված կարողությունների ամրապնդման նպատակ չի հետապնդում, ապա գումարները որևէ որակական փոփոխություն կարող են չտալ»,-ասաց Մնացականյանն ու ավելացրեց, որ ԱԳ սնումը պետբյուջեից եղել է շատ խնայողական, իսկ Հայաստանի հետ համեմատելի երկրների համեմատ եղել է ընդգծված խնայողական։

Մնացականյանն ասաց,կառավարության մոտեցումն է եղել խոսել ոչ թե ուղղակի ֆինանսներից, այլ նպատակային ֆինանսներից, որոնք իմաստ ունեն միջնաժամկետ ու երկարաժամկետ հեռանկարում ինստիտուցիոնալ կառավարման ամրապնդման առումով։

«Այս տարմաբանությամբ է, որ 2019-ին մենք չենք մոտեցել ու ասել, որ գումարները քիչ են, ավելացրեք»,-նշեց նախարարը՝ ավելացնելով, որ ընդարձակ քննարկումներ են եղել կառավարության տարբեր  ներկայացուցիչների հետ, թե որ նպատակի ու գործառույթների համար ինչքան ֆինանս է հարկավոր։

Մնացականյանը չհամաձայնեց նաև Խաչատրյանի այն դիտարկմանը, թե Հայաստանն աշխարհում բարեկամների պակաս ունի։

«Մենք բարեկամների պակաս չունենք աշխարհում, մենք համագործակից պետություն ենք տարբեր հարթակներում, տարբեր ուղղություններով, մենք շատ հստակ ենք մեր արտաքին քաղաքականության տրամաբանության գերակայությունների կառուցման առումով, այդ տրամաբանությունը կառուցված է մեր ազգային շահերի հետապնդման հիման վրա, ազգային անվտանգության ճարտարապետությունը կառուցված է շատ գիտակցաբար։ Այսօր մենք ունենք լրջագույն մարտահրավեր մեր առջև, դա վերաբերում է Թուրքիայի վարած ագրեսիվ քաղաքականությանը, մենք սրա մասին միշտ խոսել ենք, այսօր տեսնում ենք այդ քաղաքականության սփռումը ամբողջ հարևանությամբ, այն արտահանվել է Հարավային Կովկաս։ Դա վերաբերում է մեզ անմիջապես, մեզ համար դա մարդկային կյանքներ են, մեզ համար լրջագույն մարտահրավեր է, բայց այդ մարտահրավերը միայն մեզ չի վերաբերում»,-ասաց նախարարը։

ԱԳ նախարարի խոսքով, ԵԱՀԿ Մինսկի համանախագահության հետ աշխատանքները շարունակվում են, որպեսզի կարողանան անհրաժեշտ արդյունքների հասնել տարածաշրջանում կայնության ու խաղաղության վերականգնման առումով, ինչպես նաև ազգային այս լուրջ խնդիրը նվազեցնելու ու բացառելու համար։

Բանախոսն ասաց, այսօր մարտի դաշտում հայկական կողմը գոյութենական պայքար է մղում իր ուժերով, բայց կան համագործակցության անհրաժեշտ եղանակներն ու հնարավորությունները, որոնք օգտագործվում են ու կօգտագործվեն։

«Ոչ ամենն է հնարավոր, և ոչ ամենն է արտահայտվում անմիջապես, բայց մենք եղել և մնում ենք միջազգային հարաբերությունների սուվերեն անդամ,  հետպնդում ենք մեր շահերը՝ օգտագործելով սուվերենության բոլոր գործիքակազմերը»,-ասաց ԱԳ նախարարը։