Ձեր վստահելի աղբյուրը

«2021 թվականի պետական բյուջեով Շրջակա միջավայրի նախարարությունը իրականացնելու է վեց ծրագիր և 25 միջոցառում»,- այսօր խորհրդարանում 2021 թվականի պետական բյուջեի նախագծի քննարկման ժամանակ ասաց ՀՀ Շրջակա միջավայրի փոխնախարար Իրինա Ղափլանյանը։

Նա նշեց, որ այդ ծրագրերի համար ֆինանսավորումը կազմում է 8 մլրդ 840 մլն դրամ, ինչը համապատասխանում է 2021-23 թթ. ՄԺԾԾ-ով հաստատված չափաքանակին։

«Առանց դրամաշնորհային ծրագրերի՝ 2021 թվականի պետական բյուջեի նախագծով հատկացումները կկազմեն 6 մլրդ 776 մլն դրամ։ Գերմանիայի զարգացման վարկերի բանկի դրամաշնորհային ծրագրով էլ նախարարությանը կհատկացվի 2 մլրդ դրամ»,- ներկայացրեց Իրինա Ղափլանյանը։

ՇՄ փոխնախարարը տեղեկացրեց նաև, թե կոնկրետ ինչ միջոցառումներ են իրականացվելու առաջիկա տարում։ Այսպես, ծրագրերից մեկն, օրինակ, ՇՄՆ բնապահպանական ծրագրերի իրականացման գրասենյակի աշխատակազմերի պահպանմանն է վերաբերում, մյուսը՝ ՇՄՆ տեխնիկական կարողությունների ընդլայնմանը. այս երկու ծրագրերի համար նախատեսված հատկացումը 1 մլրդ 685 մլն դրամ է։

«ՇՄՆ ենթակայության տակ գործող ՊՈԱԿ-ների պահպանմանն ուղղված միջոցառումների համար էլ նախատեսվում է 3 մլրդ 574 մլն դրամ, որից հատուկ պահպանվող տարածքների համար նախատեսված է 1 մլրդ 130 մլն դրամ։

«Կենդանաբանական այգի» ՀՈԱԿ-ի պահպանության համար էլ նախատեսվում է 302 մլն դրամ։ Իսկ  անտառների կառավարման ծրագրին հատկացվելու է 2 մլրդ 177 մլն դրամ՝ այդ թվում «Հայանտառ» ՊՈԱԿ-ի ծախսերը։ 215 մլն դրամ էլ հատկացվելու է Սևանա լճի կենսապաշարների հաշվառման միջոցառումներին։ Միջազգային պարտավորությունների իրականացման ծրագրին էլ հատկացվելու է 7 մլն դրամ»,- ներկայացրեց Իրինա Ղափլանյանը։