Ձեր վստահելի աղբյուրը

«Վերջին երեք-չորս օրերեի ընթացքում հակառակորդը հիմնական ջանքերը կենտրոնացրել է Շուշիի ուղղությամբ։ Այդ ժամանակահատվածում ընթացել են համառ մարտեր, ՊԲ ստորաբաժանումները վճռականորեն պաշտպանել և պաշտպանում են մեր ինքնության, Արցախի խորհրդանիշներից մեկը՝ բերդաքաղաք Շուշին  և վճռականորեն տրամադրված են՝ պատվով կատարել իրենց խնդիրը»,- Հայկական միասնական տեղեկատվական կենտրոնում տեղի ունեցած ասուլիսում ասաց Արցախի Հանրապետության Պաշտպանության բանակի ներկայացուցիչ, գնդապետ  Սուրեն Սարումյանը։

Նա նշեց, որ օրվա ընթացքում հակառակորդը կրկին գրոհներ է ձեռնարկել Շուշիի ուղղությամբ, գրոհող ստորաբաժանումները, խմբավորումները հայտնաբերվել և ենթարկվել են կրակային ներգործության, կրել մեծ կորուստներ։ Այդ հատվածում  ստորաբաժանումներին հաջողվել է գերեվարել երկու ադրբեջանցի զինծառայողի։

«Հակառակորդը մարտական գործողություններ ձեռնարկել է նաև ռազմաճակատի մյուս հատվածներում։ Յուրային զորքերը որոշ հատվածներում զբաղեցրել են առավել նպաստավոր բնագծեր։ Օրվա ընթացքում տարբեր ուղղություններում ոչնչացվել է թշնամական ուժերին պատկանող մեկ տանկ, չորս ավտոտեխնիկա, ութ ԱԹՍ։

Հարավարևմտյան հատվածում ընթացող գործողությունների արդյունքում բանակային ստորաբաժանումներին հաջողվել է որպես ռազմավար վերցնել հակառակորդի մեկ տանկ ևհրետանային միջոցներ»,- ասաց Ս. Սարումյանը։

Նա հայտնեց, որ ներկայում Շուշիի ուղղությամբ մարտական գործողությունները դեռ շարունակվում են։

«Կա մի նրբություն․ մարտական գործողությունների տրամաբանությունը ենթադրում է գործողությունների զարգացում, որոշակի ժամանակահատված, որի ընթացքում տեղի են ունենում այդ գործողությունները։ Մարտական գործողությունների արդյունքների մասին կարելի է խոսել դրանց ամբողջության մեջ, երբ դրանք մոտենում են ավարին կամ արդեն ավարտվել են։

Մարտական գործողությունների աշխարհագրությունը ենթադրում է նաև գաղտնիության որոշակի նկատառումներ, այդ իսկ պատճառով երբեմն նպատակահարմար չէ խոսել նույնիսկ տարածքային ձեռքբերումների մասին։ Ամեն դեպքում, մենք մեր ժողովրդից թաքցնելու ոչինչ չունենք, խնդրում ենք հետևել միայն պաշտոնական տեղեկություններին և աղբյուրներին»,- նշեց ՊԲ ներկակյացուցիչը։ 

Ս. Սարումյանն ասաց, որ ադրբեջանական կողմը կարողացել է ներթափանցել որոշ ուղղություններում Արցախի բուն տարածք. «Այն հատվածներում, որոնք համարվում են անվտանգության գոտի, մեր նահանջը պայմանավորված է եղել մարտավարական նկատառումներով, այսինքն՝ երբ գործ ունենք հարթավայրային տարածքի հետ, իսկ ավելի նպաստավոր բնագծեր կարելի է զբաղեցնել բարձունքներում, ավելի նպատակահարմար է կատարել խուսավարում և զբաղեցնել այդ բարձունքները՝ հակառակորդի գործողություններին առավել արդյունավետ հակազդելու եւ խոցելու համար»։

Նա ընդգծեց, որ Արցախի տարածքում կատարվող գործողությունները հակառակորդին չեն ներվելու։

«Վստահ եղեք, որ բանակը կարողանալու է ջարդել հակառակորդին, կարողանալու է զսպել նրա զավթողական նկրտումները և կարողանալու է անվերապահորեն կատարել իր խնդիրը։ Զորքերի տրամադրությունը մարտական է, վատատեսական տրամադրություններ չկան, տղաներն ամուր են ոգով և պատրաստ են մինչև վերջ պաշտպանել հայրենիքը, կատարել իրենց պարտքը»,- նշեց նա։

ՊՆ ներկայացուցչի խոսքով, ինչպես միշտ, անհաջողություններ կրելով մարտադաշտում, հակառակորդը փորձում է դա փոխհատուցել խաղաղ բնակավայրերին հասցնելով  հարվածներ, կրկին թիրախավորվել են Արցախի խաղաղ բնակավայրերը, որտեղ չկա որևէ ռազմական օբյեկտ, ինչը միանշանակ ռազմական հանցագործություն է, պատերազմական օրենքների խախտում։

«Օպերատիվ-մարտավարական իրադրությունը գտնվում է ՊԲ ստորաբաժանումների վերահսկողության ներքո։ Վստահեցնում եմ, որ հաղթանակը մերն է լինելու»,- ասաց Արցախի Պաշտպանության բանակի ներկայացուցիչ, գնդապետ  Սուրեն Սարումյանը։