Ձեր վստահելի աղբյուրը

Երեկ ԱԺ «Իմ քայլը» խմբակցությունը հայտարարություն տարածեց, որտեղ ստեղծված իրավիճակին անդրադարձից զատ նշվում է նաև, որ խմբակցությունը չի պատրաստվում մասնակցել Հայաստանում կայունության խաթարման նպատակ ունեցող որևէ նիստի և վտանգել ռազմաճակատն ու այն պահող մարդկանց կյանքը։ Բացի այդ, խմբակցությունը ընդդիմությանը ներկայացրել էր պահանջ, որում մասնավորապես նշված էր.

«Պահանջում ենք, որ ընդդիմությունը շատ հստակ ի լուր ողջ հայության և աշխարհի հայտարարի,
որ իրենք. 1. Կողմնակից են ռուսական միջնորդության չեղարկմանը, 2. Կողմնակից են ռուսական խաղապահների դուրսբերմանը շփման գծից, 3. Կողմնակից են պատերազմի շարունակմանը:
Այս հայտարարությունն անելուց հետո ընդդիմադիր ուժերը պարտավոր են նաև ներկայացնել առաջարկվող վերսկսվելիք պատերազմում հաղթանակի հասնելու ճանապարհային քարտեզը»:

Panorama.am-ը զրուցեց «Իմ քայլը» խմբակցության պատգամավոր Սոֆյա Հովսեփյանի հետ՝ հասկանալու՝ արդյո՞ք բոլոր պատգամավորներն են ծանոթ եղել հայտարարության տեքստին, և արդյո՞ք կողմ են դրան։

Panorama.am. Արդյո՞ք իշխանական բոլոր պատգամավորներն են ծանոթ եղել խմբակցության հայտարարության տեքստին։

Ս. Հովսեփյան. Տեղյակ էինք, որ հայտարարություն պետք է լինի։ Հայտարարության տեքստի առաջին մասը քննարկվել է, և ընդհանուր որոշում է եղել։ Մի քանի դրույթներ ևս կային, որոնք հայտարարության տեքստում տեղ չեն գտել, գուցե տեքստը ավելի կարճ ներկայացնելու համար։ Հայտարարության երկրորդ մասը, տեղյակ չեմ, քննարկվել է, թե չէ։ Ես ներկա չեմ եղել, դրա համար չգիտեմ՝ ընդհանուր համաձայնություն կա՞, թե՞ ՝ոչ։ Այնուամենայնիվ, «Իմ քայլը» խմբակցության անունից էր դա։

Panorama.am. Տեսքստի ո՞ր մասը չի քննարկվել, արդյո՞ք խոսքը ընդդիմադիր ուժերին ուղղված ահանջ-կետերի մասին է։

Ս. Հովսեփյան. Ես դրան ծանոթ չեմ եղել։ Բայց, գտնում եմ, որ այսօր ցանկացած մարդ պետք է իր գործունեությունն ու քայլերը հստակեցնի։ Երբ պահանջներ են հրապարակվում, գուցեև օբյեկտիվ պահանջներ, պետք է հստակեցվեն դրանք։ Երբ, օրինակ, վարչապետի հրաժարական են պահանջում, ապա պետք է ազնիվ լինեն և ասեն՝ ումո՞վ են ուզում փոխարինել վարչապետին, դա՝ մեկ, և երկրորդ, եթե գտնում են կար լուծում, ապա ո՞րն էր դա։ Կարծում եմ, որ ամեն դեպքում, մենք պետք է քաղաքական խաղերը մի կողմ դնենք և մտածենք սահմանի և արցախցիների անվտանգության մասին։

Panorama.am. Այնուամենայնիվ, ծանոթ չլինելով հայտարարության տեքստի մի մասին, պաշտպանո՞ւմ եք այն։

Ս. Հովսեփյան. Ես մի հարց եմ ուզում տալ, այս պարագայում, եթե ես «Իմ քայլը» խմբակցության անդամ եմ, թեկուզ տեղյակ չեմ տեսքտի երկրորդ հատվածից, պաշտպանեմ, կամ չպաշտպանեմ, որևէ բան փոխվո՞ւմ է։ Ես հասկանում եմ պատասխանատվությունը, և հասկանում եմ, որ եթե արվել է դա, ուրեմն նաև իմ մեղքը կա այդտեղ։ Ես դա շատ լավ հասկանում եմ։ Բայց իմ կողմից այդ հայտարարությունը պաշտպանել կամ չպաշտպանելը երկրորդական է։ Սա «Իմ քայլի» կողմից արված հայտարարություն է, և եթե ես ասեմ՝ գիտեք, ամբողջական տեքստին ծանոթ չեմ եղել, դա ոչինչ չի փոխում իրադրության մեջ։ Այս դեպքում քաղաքական թիմի հայտարարություն է արվել։

Այլ հարց է, թե ես որքանով եմ կողմ համաձայնագրին. Բացարձակ կողմ չեմ, ինձ համար բացարձակ անընդունելի է։ Բայց ես կարծում եմ, որ մենք պետք է լուծում գտնենք՝ բայց ոչ պղտոր ջրում ձուկ որսալով։ Ուղղակի լուծում պետք է գտնել, առանց ավելորդ քաղաքական շահարկումների, մենք այսօր ժամանակ ենք կորցնում։ Եթե անգամ մենք վաղը պատերազմելու ենք, հենց վաղը, այո, չեմ ասում տարիներ հետո, մենք հենց հիմա ժամանակ ենք կորցնում, որի ժամանակը չունենք։ Եթե մենք պատրաստվում ենք այդ փաստաթուղթը փոխել, ապա ժամանակ ենք կորցնում այս պահին։