Ձեր վստահելի աղբյուրը

Ռուսաստանի Դաշնության արտաքին գործերի նախարար Սերգեյ Լավրովն այսօր հարցազրույց է տվել ռուսական ու արտասահմանյան լրատվամիջոցներին։ Լավրովը պատասխանել է նաև Լեռնային Ղարաբաղի վերաբերյալ հարցերին։

Թուրքիայի խաղաղապահ առաքելությունները չեն ուղարկվի Լեռնային Ղարաբաղի տարածք

«Թուրքիայի Հանրապետության ոչ մի խաղաղապահ ստորաբաժանում չի ուղարկվի Լեռնային Ղարաբաղ: Դա հստակ ասված է [Ադրբեջանի, Հայաստանի և Ռուսաստանի ղեկավարների հայտարարության մեջ՝ Ղարաբաղում ռազմական գործողությունների ամբողջական դադարեցման մասին]», - ասել է Լավրովը:

Լավրովի խոսքով՝ Թուրքիայից դիտորդների շարժունակության սահմանները կսահմանափակվեն Ադրբեջանում տեղակայված ռուս-թուրքական կենտրոնով՝ Լեռնային Ղարաբաղում հրադադարի ռեժիմը վերահսկելու համար:

«Թուրք դիտորդների շարժունակության սահմանները սահմանափակվում են այն աշխարհագրական կոորդինատներով, որոնք որոշվելու են Ադրբեջանի տարածքում ռուս-թուրքական դիտորդական կենտրոնի տեղակայմամբ Ադրբեջանի տարածքի այն հատվածում, որը մոտ չէ Ղարաբաղին ու որը լրացուցիչ կհամաձայնեցվի», - ասել է Լավրովը:

Համաձայնությունը կպահպանվի

Սերգեյ Լավրովը վստահություն է հայտնել, որ Լեռնային Ղարաբաղի վերաբերյալ համաձայնությունը կպահպանվի։

«Առայժմ չկան նշաններ, որ որևէ մեկը փորձում է տապալել ձեռք բերված պայմանավորվաությունները»,-ասել է Լավրովը։

Ղարաբաղի վերաբերյալ նոր պայմանագրերի տարբերությունը նախորդներից

Ռուսաստանի մասնակցությամբ ձեռք բերված վերջին համաձայնագրերը Լեռնային Ղարաբաղի վերաբերյալ, Սերգեյ Լավրովի խոսքերով, տարբերվում են նախորդներից նրանով, որ դրանք ենթադրում են տարածաշրջանում իրավիճակի մոնիտորինգի իրական մեխանիզմ։ հինգշաբթի ասաց ՌԴ ԱԳ նախարար Սերգեյ Լավրովը:

«Այս բոլոր համաձայնություններին սկզբունքորեն նոր որակ տրվեց այն ժամանակ, երբ անցած շաբաթվա ընթացքում Ռուսաստանի, Ադրբեջանի  նախագահների և Հայաստանի վարչապետի մակարդակով ինտենսիվ բանակցություններ էին վարվում: Նախագահ Պուտինը օրը մի քանի անգամ զրուցում էր իր գործընկերներից յուրաքանչյուրի հետ, և հիմնական ուշադրությունը կենտրոնանում էր նրա վրա, որ համաձայնեցվեր խաղաղապահ գործունեությունը, դրա կազմը որոշեց Ռուսաստանի Դաշնությունը՝ Բաքվի և Երևանի խնդրանքով», - ասել է Լավրովը։

Լավրովն ընդգծել է, որ Ղարաբաղի վերաբերյալ ներկայիս համաձայնագրերը սկզբունքորեն տարբերվում են նախորդներից, քանի որ այն ժամանակ չի ստեղծվել հրադադարի ռեժիմի դիտարկման մեխանիզմ:

Ղարաբաղի հինգ շրջանների անցումը Բաքվին

Եթե հնարավոր լիներ Ղարաբաղի հարցով ավելի շուտ համաձայնության գալ դիվանագիտական ճանապարհով, ապա հինգ շրջանները միևնույնն է անցնելու էին Բաքվին, բայց խաղաղ ճանապարհով, ասել է Լավրովը։

Լավրովը նշել է, որ կնախընտրեին, որ ամբողջ հակամարտությունը վաղուց կարգավորվեր ԵԱՀԿ Մինսկի խմբի համանախագահների կողմից մշակված սկզբունքների հիման վրա։

«Եթե մենք գնայինք այդ ճանապարհով, արդյունքը, հավանաբար, գործնականում նույնը կլիներ։ Ինչ վերաբերում էր հինգ, ապա երկու շրջանների ազատագրմանը, ապա այն առաջին հերթին կարվեր առանց արյան, և երկրորդ, դա կարվեր վերջնական քաղաքական կարգավորման հետ միասին»,-ասել է Լավրովը։

Մինսկի խմբի համանախագահությունը՝ Ռուսաստանի, Ֆրանսիայի, ԱՄՆ-ի գլխավորությամբ չի ընդլայնվում

Մինսկի խումբը շարունակում է գործել։ Այն մոտ 10 երկիր է, որում ներառված է նաև Թուրքիան, և Մինսկի խումբը զբաղվում է Լեռնային Ղարաբաղով, այն պարբերաբար լսում է համանախագահների զեկույցները։ Խոսելով ԼՂ կարգավորման գործում Թուրքիայի դերի մասին՝ ասաց Սերգեյ Լավրովը։

«Մինսկի խմբի յուրաքանչյուր անդամ ունի լիարժեք իրավունք՝ հայտնելու իր դիրքորոշումները, առաջարկություններ անել։ Եվ համանախագահները պետք է ուշադրություն դարձնեն դրանց։ Չկան պլաններ ընդլայնել համանախագահ եռյակը՝ Ռուսաստանի, Ֆրանսիայի ու ԱՄՆ-ի գլխավորությամբ»,-ասաց Լավրովը։

Լավրովը նշեց, որ համանախագահ երկրների հետ մշտական կապի մեջ են և հաջորդ շաբաթ սպասում են ԱՄՆ և Ֆրանսիայի համանախագահներին Մոսկվայում, որտեղ նրանց կներկայացվի, թե ինչպես են իրականացնում խաղաղապահությունը, ինչպես նաև քննարկումներ կանեն, ինչպես նպաստել խաղաղ կյանքի վերադարձին՝ հաշվի առնելով ԼՂ-ում ու դրա շուրջ բոլոր էթնո-դավանաբանական համայնքների իրավունքները։ 

Լեռնային Ղարաբաղի կարգավիճակի որոշման արհեստական ժամկետներ չենք դնում

«Լեռնային Ղարաբաղի ստատուսի հարցը քաղաքական գործընթացի գլխավոր թեման է, այն որոշված չէ, այս մասին ասել է նաև նախագահ Ալիևը։ Մենք ելնում ենք նրանից, որ ստատուսը կորոշվի կախված նրանից, թե ինչ գործողություններ մենք պետք է ձեռնարկենք, որ օգնենք վերականգնել էթնո-դավանաբանական  համաձայնությունը Լեռնային Ղարաբաղում, ինչպես եղել է երկար տարիներ մինչև պատերազմը՝ ԽՍՀՄ փլուզումից առաջ։

Ստատուսը որոշել կարելի է միայն այն բանից հետո, երբ պարզ կլինի, թե ինչպիսի իրավունքներ ունեն բոլոր նրանք, ովքեր ապրել են ԼՂ-ում ու իրավունք ունեն այնտեղ վերադառնալ, և իհարկե նրանք, ովքեր այս ողջ ընթացքում ապրել են այդ տարածքում։ Սա վերաբերվում է և ադրբեջանցիներին, և հայերին։ Պետք է վերականգնել վստահությունը, միջէթնիկ խաղաղությունը, ամենօրյա կյանքը։ Սա հեշտ չէ անել ու մենք այստեղ արհեստական ժամկետներ չենք դնում»,-ասաց Լավրովը։