Ձեր վստահելի աղբյուրը

«Հայրենիք» կուսակցության նախագահ Արթուր Վանեցյանն ազատ արձակվեց։ Երևանի ընդհանուր իրավասության դատարանը բավարարել է Արթուր Վանեցյանին ձերբակալելու որոշման դեմ պաշտպանների բողոքը եւ նրա ձերբակալությունը համարել ոչ իրավաչափ։ Այս մասին հայտնում է «Փաստինֆոն»։

Հիշեցնենք, որ նոյեմբերի 11-ին Արթուր Վանեցյանին երկու անգամ ԱԱԾ են կանչել։ Առաջին անգամ նա հարցաքննվել է որպես վկա, իսկ երկրորդ հարցաքննության ժամանակ 225.1 և 307.1 հոդվածներով ձերբակալություն է իրականացվել։ Արթուր Վանեցյանը ձերբակալվել է 225.1 (օրենքով սահմանված կարգի խախտմամբ դիտավորությամբ հավաք կազմակերպել) և 307.1 (Ռազմական դրության իրավական ռեժիմի ընթացքում սահմանված միջոցառումները և ժամանակավոր սահմանափակումները խախտելը, որն անզգուշությամբ առաջացրել է մարդու մահ կամ այլ ծանր հետևանքներ) հոդվածներով։ Ձերբակալման որոշման դեմ պաշտպանները բողոք են ներկայացրել։

ԱԱԾ նախկին տնօրենի ձերբակալությունը հաջորդել էր Արցախի տարածքների մեծ մասը Ադրբեջանին հանձնելու Վարչապետի հայտարարության դեմ բողոքի ակցիաներին:

«Ակնհայտ է, որ Արթուր Վանեցյանի նկատմամբ իրականացվում է խայտառակ քաղաքական հետապնդում, նա գտնվում են ապօրինի անազատության մեջ։ Նրա ձերբակալումը ոչ իրավաչափ ճանաչելու պահանջով բողոքներն արդեն իսկ ուղարկվել են դատարան։

Փաստենք մեկ հետաքրքրական հանգամանք ևս` քաղաքական գործիչները ձերբակալվել են 3 օրով, ճիշտ մինչ այն օրը, երբ պետք է սկսեն իրագործվել ՀՀ վարչապետ Նիկոլ Փաշինյանի կողմից ստորագրված կապիտուլիացիոն հայտարարությամբ նախանշված քայլերը», - հայտարարել են փաստաբանները։