«Ինքը հադրութցի է, զոհվածի մայր, իր տղու սաղ արածը ջուրն ընկավ»
Մի խումբ քաղաքացիներ բողոքի ակցիա են իրականացնում ՀՀ-ում Ֆրանսիայի դեսպանատան դիմաց։ Նրանք ցանկանում են նամակ փոխանցել դեսպաններին՝ Հադրութն Արցախի կազմում թողնելու պահանջով։
«Ես հարդութցի չեմ, երևանաբնակ լոռեցի եմ, ով պատերազմական գործողությունների առաջին ժամերից Հադրութում էր։ Այս անմարդկային պատերազմը, փաստորեն, տեղահան արեց հադրութցիներին, թեև բոլորն էլ վստահ են՝ ժամանակավոր։ Ես, հադրութցիների աչքերին նայելով, զգում եմ վստահություն, որ մենք պայքարով հետ ենք բերելու մեր հողերը։ Եվ այդ պայքարը կասեցնելը մենք համարում ենք դավաճանություն։ Հադրութի հետ մենք ունենք շատ նպատակներ, ձգտումներ...։ Ես հավատով լի եմ, որ Հադրութը վերադարձվելու է հայերին։ Պայքարենք և հուսանք»,- լրագրողների հետ զրույցում ասաց ակցիայի մասնակիցներից մեկը։
Իր բողոքի ձայնը հնչեցնող հադրութցիներից մեկն էլ նշեց՝ Հադրութը երբևէ չի եղել Ադրբեջանի կազմում, ինքնավարի կազմում է եղել, և իրենք ակցիա են իրականացնում՝ հուսալով, որ ինչ-որ կերպ կարող են պաշտպանել այն։
«Հիմա մեր իրավունքները՝ որպես մարդ, խախտված են։ Եվ եկել ենք միջազգային հանրությանը հայտնելու, որ մենք իրավունք ունենք ապրելու, իրավունք ունենք մեր ստեղծածը պահելու։ Մենք ուզում ենք հանդիպել դեսպանին, որպեսզի փոխանցենք մեր մտքերը։ Հուսով ենք, որ Ֆրանսիան ինչ-որ չափով կաջակցի մեջ»,- ասաց նա, ապա ցավով նշեց, որ շատ հադրութցիներ անգամ իրենց անձնագրերն ու ծննդյան վկայականները չեն կարողացել բերել Հայաստան։
Չնայած ակցիային մասնակցելուն, որոշ հադրութցիներ որևէ հույս չեն փայփայում։
«Այս ակցիայից ոչ մի հույս չեմ կարող ունենալ։ Իմ հույսն այն ժամանակ կտրվեց, երբ ստորագրվեց այս ապերախտ փաստաթուղթը։ Մինչև այսօր մենք մտածում էինք, որ գոնե կվերադառնանք մեր տները, մեր հայրենիք։ Հիմա էս փաստաթուղթը ստորագրվեց, էլ ի՞նչ հույսի մասին է խոսքը։ Եթե Արցախին ստատուս տային, եթե Արցախի անկախությունը ճանաչեին...։ Իսկ եթե այսօր պետք է գնանք թուրքի մոտ ապրենք, էլ ինչի՞ մասին է խոսքը, ավելի լավ չէ՞ր սաղին տանեին Քուռը գցեին։ Էս ինչ օրի ենք»,- նշեց ակցիայի մասնակիցներից մեկը, ապա ցույց տալով կողքին կանգնած քրոջը նշեց.
«Ինքը հադրութցի է, զոհվածի մայր, իր տղու սաղ արածը ջուրն ընկավ։ Տղան գնացել էր հայրենիք պաշտպանելու, ո՞ւր է հայրենիքը։ Գնացել էր հորն ու մորը պաշտպաներ..., ո՞վ է սրա պատասխանը տալու»։
Հարակից հրապարակումներ`
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
