Ձեր վստահելի աղբյուրը

«Որքան հասկացա ՀՔԾ են կանչում կուսակցությունների ղեկավարներին. քաղաքական իշխանությունը շարունակում է իր բռնությունների գործիքակազմից օգտվել»,- այսօր Ազատության հրապարակում ՀՀ վարչապետ Նիկոլ Փաշինյանի հրաժարականի պահանջով ակցիայի ընթացքում ասաց ՀՅԴ ԳՄ անդամ Լիլիթ Գալստյանը։                

Նրա խոսքով, այս «էժանագին» միջոցներով իրենց պայքարը չի ընկրկի.

«Մենք դավաճան ենք որակում բոլոր նրանց, ովքեր ծախել են մեր հայրենիքի մի հատվածը, մենք չենք հաշտվում այդ ամենի հետ, գնահատական ենք տալիս։ Եվ իշխանությունը, որը նվաստացրել է մեր արժանապատվությունը և մեր թիկունքում ազգադավ համաձայնագիր է ստորագրել, օր առաջ պետք է հեռանա։ Ես կոչ եմ անում մեր հայրենակիցներին գալ Ազատության հրապարակ և միանալ մեր պայքարին։ Սա պայքար չէ պատերազմի համար, մենք այլևս ցավալի փաստի առաջ ենք կանգնել։ Մենք ուզում ենք պայքարել ստորագրված պայմանագրի հետագա գործարկման դեմ։ Մենք ուզում ենք ունենալ պետականության գիտակցում ունեցող իշխանություն, որը կկարողանա բանակցային սեղանին հետագա գործընթացները վարել»։

Ըստ Լիլիթ Գալստյանի, Հայաստանի թիկունքում մեծ դավադրություն է վարվել, և մենք Մեղրիի ճանապարհով երկու թուրքի հնարավորություն ենք տալու միանալու։

«Նիկոլ Փաշինյանը 2.5 տարի իր ստերով սնել է հասարակությանը, մի բան ասել է, այլ բան՝ արել։ Նա մեր բոլորի օգնությամբ եկավ իշխանության, և հայտարարեց, որ մեզնից յուրաքանչյուրը երկրի վարչապետ է, բայց տեսանք, որ գիշերային դավադրությամբ կապիտուլյացիայի համաձայնագիր է ստորագրվել։ Եվ մենք այսօր Հայաստանում ունենք հազարավոր փախստական արցախցիներ, մենք ունենք աննկարագրելի մարդկային կորուստներ։ Եվ ամենացավալին այն է, որ պարզվում է, նա մեր թիկունքում բանակցել է։ Ամսի 10-ի այս նվաստացուցիչ փաստաթուղթը, որն իր ձեռամբ վավերացվել է..., եթե դա քո սեղանին էր, բա մեր տղաներին ինչո՞ւ էիր տանում թուրքի բերան, ինչո՞ւ էիր դարձնում թնդանոթի միս»,- նշեց նա։

Դիտարկմանը, որ Նիկոլ Փաշինյանը որպես արդարացում նշում է՝ եթե այդ փաստաթուղթը չստորագրվեր, 20 հազարից ավելի զինծառայողներ կընկնեին շրջափակման մեջ և կզոհվեին, Լիլիթ Գալստյանն արձագանքեց՝  2.5 տարում Նիկոլ Փաշինյանը չկարողացավ ո՛չ ռազմական, ո՛չ քաղաքական և ո՛չ էլ դիվանագիտական ճակատներում հաջողություններ արձանագրել.

«Նա մեր երկիրը տարավ  պարտության։ Պարտված իշխանությունը մեր երկրում այլևս անելիք չունի։ Նա պիտի հեռանա։ Պիտի գան քաղաքական ուժեր, որոնք այս նվաստացուցիչ փոսից երկիրը կհանեն։ Մենք պատերազմ չենք ուզում, մենք ուզում ենք մեր ռազմավարական դաշնակիցների հետ հարաբերությունները բարելավել։ Իսկ իշխանությունը փորձում է շեղել հանրությանը, թե իբր մենք պատերազմ ենք ուզում»։