Ձեր վստահելի աղբյուրը

«Այդ խայտառակ փաստաթուղթը ստորագրողը, որ ստորագրելուց առաջ, ընդհանրապես, չի էլ մտածել՝ այդ հարցերը ոնց է պետք կարգավորել, հիմա էլ այդ մասին չի մտածում»,- այսօր Ազատության հրապարակում վարչապետ Նիկոլ Փաշինյանի հրաժարականի պահանջով հանրահավաքի ընթացքում ասաց քաղաքագետ Կարեն Բեքարյանը։

Նրա խոսքով, արցախցիների անվտանգության մասին իշխանությունը չի մտածել։ Ըստ նրա, Շուշիում ադրբեջանցիների լինելու դեպքում ստեփանակերտցիների անվտանգության խնդիրը պետք է ապահովի ռուսական կողմը, ու եթե պիտի ապահովի, այդտեղ ի՞նչ դետալներ կան մարդկանց իրավունքների, գույքի, տեղաշարժի հետ կապված..., ոչինը արված չէ։

«Այստեղ կա նաև երկրորդ շատ էական խնդիրը։ Արցախում էլ մարդիկ կարողանում են ինչ-որ բան լսել, երբ Արայիկ Հարությունյանի քմահաճույքը բռնում է՝ մի երկու տողանոց բովանդակությամբ աննորմալ ուղերձ անելու...։ Ասել եմ, ու նորից կասեմ՝ Նիկոլ Փաշինյանը պետք է ժամ առաջ գնա, որպեսզի այս հարցերը լուծման ու որոշակիացման հնարավորություն ստանան։ Ո՞վ է զբաղվում, ի՞նչ է անում, որ արցախցիների շահերը լիարժեք, դետալ առ դետալ պաշտպանված լինեն։ Արայիկ Հարությունյանը, եթե ինքնասիրություն ունենար, արդեն պետք է գնացած լիներ, որ այնտեղ եղած ժողովուրդը գնար մի մարդու հետ հարց լուծեր, որի նկատմամբ գոնե մինիմալ հարգանք ունի։ Բնականաբար, մինչև սրանք չհեռանան, մենք անգամ այդ տրիվիալ հարցերի մեջ խնդիրներ ենք ունենալու»,- ներկայացրեց քաղաքագետը։

Դիտարկմանը, որ իշխանություններն այս օրերին փորձում են այս ամենի պատասխանատվությունը դնել նաև բանակի ուսերին, Կարեն Բեքարյանն արձագանքեց՝ բանակ ասելիս, պետք է հասկանալ բոլոր զինծառայողներին, սպաներին, աշխարհազորին և կամավորներին։

«Ես կառաջարկեի բանակը թողնել հանգիստ։ Այլ բան, երբ բանակ ասելով նկատի ունենք քաղաքականության հետ կապված երկու դեմքերին՝ պաշտպանության նախարարին և ԳՇ պետին.  իրենց ուղղված շատ հարցեր կան, իրենք այդ հարցերի պատասխանները մի օր պիտի տան։ Վարչապետի՝ իշխանության մնալ-չմնալը իրենց որևէ կերպ չի ազատում այդ հարցերից։ Այդ ո՞նց էր ԳՇ-ից Արծրունը ստանում ինֆորմացիա և այս ժողովրդին խաբում անընդհատ, թե հաղթել ենք, հաղթում ենք, իսկ Նիկոլը նույն ԳՇ-ից ստանում է ինֆորմացիա և գնում ու ստորագրում այդ խայտառակ կապիտուլյացիոն փաստաթուղթը։ Եթե ԳՇ-ն իր ֆունկցիան կատարել է, ներկայացրել է գերագույն գլխավոր հրամանատարին, որ մենք ծանր իրավիճակ ունենք, վարչապետը ո՞նց էր պատերազմ սադրում։ Նիկոլը պատերազմ է սադրել երկու տարի շարունակ։ Եթե ինքն այդ պատկերն ուներ իր ԳՇ-ից, ո՞նց էր պատերազմ սադրում։ Եթե չուներ, ապա ինչո՞ւ չուներ»,- շեշտեց նա։      

Քաղաքագետը պնդեց, որ ԵԱՀԿ Մինսկի խմբի համանախագահներից Նիկոլ Փաշինյանը տարբեր առաջարկներ է ստացել, և ամեն հաջորդ անգամը՝ ավելի վատ պայմաններով.

«Այստեղ շատ կարևոր կետ կա. պատերազմի ժամանակ այս երկրի վարչապետի հետ խոսող չկար, ուլտիմատումի ձևով փաստաթուղթը տվել են՝ կա՛մ այո, կա՛մ՝ ոչ։ Այդ նույն  ժամանակ ո՞ւր էր ԳՇ պետը, որ չէր ասում՝ գիտես՝ այս առաջարկն ընդունելի է, քանի որ բանակում վիճակն այդքան էլ հուսադրող չէ։ Կամ եթե ասել է, ու իր ասածը չի ընդունվել, հիմա ինչո՞ւ է լռում»։