Ձեր վստահելի աղբյուրը

ՌԴ նախագահ Վլադիմիր Պուտինը հրամանագիր է ստորագրել Լեռնային Ղարաբաղում մարդասիրական արձագանքման միջգերատեսչական կենտրոն ստեղծելու մասին։

Կրեմլի պաշտոնական կայքէջում հրապարակված փաստաթղթում ասվում է.

«Լեռնային Ղարաբաղում մարդասիրական հիմնախնդիրների լուծմանը և քաղաքացիական ենթակառուցվածքների վերականգնմանը նպաստելու համար որոշում եմ.

1. Ստեղծել մարդասիրական արձագանքման միջգերատեսչական կենտրոն (այսուհետ`միջգերատեսչական կենտրոն):

2. Սահմանել, որ.

ա) միջգերատեսչական կենտրոնի հիմնական գործառույթներն են.

Լեռնային Ղարաբաղի շրջանները լքա] քաղաքացիներին՝ իրենց մշտական բնակության վայրեր վերադառնալուն օժանդակելը,

Հայաստանի Հանրապետության և Ադրբեջանի Հանրապետության պետական մարմիններին Լեռնային Ղարաբաղում քաղաքացիական ենթակառուցվածքների վերականգնման և բնակչության բնականոն կյանքի համար պայմանների ստեղծման աջակցությունը,

ռազմական գործողությունների արդյունքում տուժած Լեռնային Ղարաբաղի շրջանների բնակիչներին մարդասիրական օգնություն տրամադրելու համար Ռուսաստանի պետական մարմինների և հասարակական կազմակերպությունների գործունեության համակարգումը,

միջազգային մարդասիրական կազմակերպությունների հետ փոխգործակցության կազմակերպման գործում Հայաստանի Հանրապետության և Ադրբեջանի Հանրապետության պետական մարմիններին օժանդակությունը,

բ) միջգերատեսչական կենտրոնում ընդգրկված են Ռուսաստանի Դաշնության քաղաքացիական պաշտպանության, արտակարգ իրավիճակների և բնական աղետների հետևանքների վերացման նախարարության, Ռուսաստանի Դաշնության արտաքին գործերի նախարարության, Ռուսաստանի Դաշնության անվտանգության դաշնային ծառայության ներկայացուցիչներ, ինչպես նաև դաշնային գործադիր այլ շահագրգիռ մարմինների ներկայացուցիչներ:

3. Միջգերատեսչական կենտրոնի ստեղծման և գործունեության հետ կապված կազմակերպական և այլ հարցերի որոշումը վստահվում է Ռուսաստանի Դաշնության Պաշտպանության նախարարությանը:

4. Սույն հրամանագիրն ուժի մեջ է մտնում ստորագրման օրվանից»: