Ձեր վստահելի աղբյուրը

Քիչ առաջ Երևան քաղաքի ընդհանուր իրավասության դատարանի Շենգավիթ նստավայրից դուրս եկավ Սիսական ջոկատի լեգենդար հրամանատար Աշոտ Մինասյանի փաստաբան Արամ Վարդևանյանը։ Նա դատարանի դիմաց հավաքվածներին տեղեկացրեց՝ դատարանը հեռացել է խորհրդակցական սենյակ։

«Ցավալիորեն եմ ասում, քննիչները փորձում էին անել ամեն հնարք, որ ձերբակալության իրավաչափության հարցի հետ քննարկվի նաև կալանավորման միջնորդությունը։ Դա նրանց չհաջողվեց մեր գործողությունների արդյունքում»,-հայտարարեց Վարդևանյանը։

Նա կասկած հայտնեց, քննիչները տեղյակ չէին Քրեական դատավարության օրենսգրքի կարգավորումներին առ այն, որ այդ երկու հարցերը չեն կարող քննվել միաժամանակ։

«Դատարանը խորհրդակցական սենյակում է, կսպասենք որոշման հրապարակմանը»,-ասաց փաստաբանը։

Փաստաբանը նշեց, որ Ա. Մինասյանին մեղադրանք է առաջադրվել Քրեական օրենսգրքի 300 (Իշխանությունը յուրացնելը), 305  (պետական, քաղաքական կամ հասարակական գործչի սպանությունը) հոդվածների նախապատրաստություն, ինչպես նաև 205 հոդվածի 2-րդ մաս։

«Ամեն դեպքում կալանավորման միջնորդություն ներկայացվել է։ Թե որն է իմաստը նման հրամանատարի նկատմամբ նման գործողություն անելու, չեմ կարող ասել, թե տրամադրությունը, թե հոգեվիճակը բոլորիս մոտ նույնն է»,,-հայտարարեց փաստաբանը, ինչին հետևեցին «քննիչ դավաճան» վանկարկումները։  

Անդրադառնալով ԱԱԾ կողմից տարածված ձայնագրությանը, նկատեց՝ այնտեղ բովանդակություն չկա, իսկ խոսակցությունը տեղի է ունեցել օրեր առաջ։

Վարդևանյանն ասաց, այս գործով նախաքննությունն ընթանում է այն տրամաբանությամբ, որ թե փաստաբանը, թե ձերբակալվածը, ըստ երևույթին նաև քննիչը տեղյակ չեն շատ բաներից։ Տեսանյութի հրապարակման պահին փաստաբանը եղել է ԱԱԾ-ում։

«Ըստ երևույթին քննիչն էլ տեղյակ չէր, որ նման տեսանյութ է հրապարակվել։ Տեսանյութի հիմնական բովանդակությունը հիմնականում նախաքննական գաղտնիք էին որակում և ինձ չէին տրամադրում»,-մանրամասնեց փաստաբանը։