Ձեր վստահելի աղբյուրը

Դատարանը քննում է «Հայրենիք» կուսակցության նախագահ Արթուր Վանեցյանի ձերբակալման որոշման իրավաչափությունը։

Վանեցյանի փաստաբան Լուսինե Սահակյանը լրագրողների հետ զրույցում հիշեցրեց, որ երեկ Արթուր Վանեցյանը ապօրինի ձերբակալվել է, և իր փաստաբանական խումբը բողոք է ներկայացրել դատարան՝ վիճարկելու ձերբակալման իրավաչափությունը։

«Նախաքննական մարմինը, քաջ գիտակցելով, որ ձերբակալումն ակնհայտ ապօրինի է, այսօր մեղադրանք է առաջադրել Արթուր Վանեցյանին՝ 35.300 և 35.305 հոդվածներով, այսինքն՝ իբրև թե իշխանության յուրացման և Նիկոլ Փաշինյանի սպանության նախապատրաստության համար։  Մեղադրանքն ակնհայտորեն ապօրինի է, բովանդակությունն էլ ակնհայտ անհասկանալի։ Մեղադրանքի էությունը չի պարզաբանվել։

Արթուր Վանեցյանը, բնականաբար, իրեն մեղավոր չի ճանաչել։ Մենք պահանջել ենք առերեսում կատարել բոլոր այն անձանց հետ, որոնք հնարավոր է վկայած լինեն իր դեմ, և բացահայտել այն ապացույցները, որոնք հիմք են տվել մեղադրանքն առաջադրելու համար, որպեսզի մենք կարողանանք ներկայացնել մեր փաստարկները, որովհետև մենք չենք պատկերացնում, թե ինչի մասին է խոսքը, ընդհանրապես։

Ընդ որում, նկատի ունենալով նաև այդ խոսակցությունը, որը հրապարակվել է ԱԱԾ-ի կողմից, մենք պահանջել ենք, որ բացահայտվի նաև, թե ովքեր են խոսող անձինք, որովհետև խոսակցություններից պարզ չէ՝ ովքեր են խոսում։ Պահանջում ենք, որ այդ անձանց հետ նաև առերեսում իրականացվի, որ եթե այդ անձը, Վանեցյան ասելով նկատի ունի կոնկրետ Արթուր Վանեցյանին, հասկանալի լինի, թե ինչի մասին է խոսում։ Եթե նա կպնդի, որ Վանեցյանը ինչ-որ հանցագործության հետ առնչություն ունի, ապա կարողանանք հարցեր ուղղել այդ անձին։ Եթե չէ՝ մենք հասկանանք՝ ինչ հարցեր ուղղել այն անձին, ով կկարողանա վկայել Արթուր Վանեցյանի անմեղությունը»,- ներկայացրեց փաստաբանը։

Նա տեղեկացրեց, որ մինչ այս պահը որևէ առերեսում չի կատարվել, որևէ ապացույց, անգամ ձևական՝ չի ներկայացվել։

Ըստ փաստաբանի, հրապարակված ձայնագրություններից էլ իրենք տեղեկացվել են սոցցանցերից և մամուլից, դրանք դեռևս չեն ներկայացվել փաստաբանական խմբին.

«Ես ընդամենը ասեմ, որ սա, բնականաբար, քաղաքական հետապնդում է, և ամեն ինչ արվում է, որպեսզի փորձեն կասեցնել ժողովրդի ցասումը, և անձինք, որոնք կարող է որոշակի գործողություններ ձեռնարկեն, որ ժողովրդին կարողանան տանել այն ուղղությամբ, որպեսզի մենք չկորցնենք մեր հայրենիքը։ Ամեն ինչ անում են, որ իրենց ծրագիրը մինչև վերջ հասցնեն։ Դատարանների համար նույնիսկ կասկածանքն ու մեղադրանքը կապ չունեն, և այս օրերը դա ցույց են տվել։ Վանեցյանը տարբեր հոդվածներով է կանչվել՝ նախ 307.4-ով, հետո 307.1-ով, 225.1-ով...»։

Լուսինե Սահակյանը տեղեկացրեց, որ դեռևս Արթուր Վանեցյանին կալանավորելու միջնորդություն իրենց չի ներկայացվել, բայց ենթադրվում է, որ մեղադրանքի նման շուտափույթ առաջադրման հետևանքը պիտի դա լինի։

«Խուզարկություններ եղել են, դրանք կատարվել են ակնհայտ ապօրինի ձևով։ Մենք բողոք ենք ներկայացնելու։ Խուզարկություն եղել է Վանեցյանի ծնողների բնակարանում, այնտեղից առգրավվել են հոր օրինական որսորդական զենքերը, դրանց մի մասը լրիվ նոր են եղել՝ նույնիսկ չօգտագործված։

Դա անում են, որ զենքերի մեծ քանակ ցույց տան։ Ութ որսորդական զենքի մասին է խոսքը, բոլորն՝ օրինական։ Ինչ վերաբերում է Արթուր Վանեցյանի տանը, ապա տունը խուզարկելու թույլտվությունը եղել է լրիվ այլ հասցեով, եկել են իբր Արթուր Վանեցյանի բնակարան, բայց ներս չեն թողել, քանի որ այդ հասցեով թույլտվություն չի եղել։ ԱԱԾ-ն այն օրի է հասել, որ սխալ հասցեով է եկել խուզարկության։ Եվ մտել են «Հայրենիք» հիմնադրամի տարածք՝ որպես բնակարան։ Նրանց արգելվել է դա անել, բայց մտել են։ Այսինքն՝ հիմնադրամը խուզարկելու իրավունք չեն ունեցել, բայց խուզարկել են, ոչինչ չեն հայտնաբերել։ Ապա արագ թույլտվություն են ստացել Վանեցյանի տան հասցեով, այնտեղ էլ ոչինչ չեն հայտնաբերվել»,- մեկնաբանեց փաստաբանը։