Ձեր վստահելի աղբյուրը

Թուրքիայի նախագահ Ռեջեփ Թայիփ Էրդողանի` Ադրբեջան թուրք զինվորականներ ուղարկելու մասին հրամանագրի նախագիծն ուղարկվել է երկրի խորհրդարան։ Այս մասին գրում է Ria-ն՝  հղում անելով Anadolu գործակալությանը:

Ակնկալվում է, որ առաջիկա օրերին Թուրքիայի խորհրդարանը կքննարկի այս հարցը:

Նշվում է, որ Էրդողանը նոյեմբերի 11-ին ասել էր, որ Անկարան և Մոսկվան հուշագիր են ստորագրել Ղարաբաղում հրադադարի ռեժիմը վերահսկելու կենտրոնի վերաբերյալ, նրանք կմասնակցեն «համատեղ խաղաղապահ առաքելությանը»: Դրանից առաջ ՌԴ նախագահի մամուլի քարտուղար Դմիտրի Պեսկովը ասել էր, որ Մոսկվան և Անկարան կաշխատեն Ղարաբաղի հարցով Ադրբեջանի տարածքում գտնվող դիտորդական կենտրոնի միջոցով, «համատեղ խաղաղապահ ուժերի մասին խոսք չկա»:

Նշենք, որ օրերս ՌԴ ԱԳ նախարար Սերգեյ Լավրովը հայտարարել էր, որ Թուրքիայի խաղաղապահ առաքելությունները չեն ուղարկվի Լեռնային Ղարաբաղի տարածք։

«Թուրքիայի Հանրապետության ոչ մի խաղաղապահ ստորաբաժանում չի ուղարկվի Լեռնային Ղարաբաղ: Դա հստակ ասված է Ադրբեջանի, Հայաստանի և Ռուսաստանի ղեկավարների հայտարարության մեջ՝ Ղարաբաղում ռազմական գործողությունների ամբողջական դադարեցման մասին]»,- ասել էր Լավրովը։

Լավրովի խոսքով՝ Թուրքիայից դիտորդների շարժունակության սահմանները կսահմանափակվեն Ադրբեջանում տեղակայված ռուս-թուրքական կենտրոնով՝ Լեռնային Ղարաբաղում հրադադարի ռեժիմը վերահսկելու համար: