Ձեր վստահելի աղբյուրը

«Եթե անգամ ելքը քաղաքական փոփոխություններն են, կարծում եմ, որ խելամիտ մարդիկ հասկանում են, որ պետք է կայունություն լինի, որ պետք է որոշակի ժամանակ անցնի։ Դուք չեք կարողանալու գնալ գյուղեր, որտեղ ժապավեններ են փակցված, և այնտեղ քարոզարշավներ անել»,- խորհրդարանում ասաց ԱԺ փոխխոսնակ Լենա Նազարյանը՝ անդրադառնալով ընդդիմության՝ արտահերթ նիստ գումարելու պահանջին։

Նազարյանը նշեց՝ մարդիկ վշտի մեջ են, իսկ դահլիճից արձագանքեցին, որ այսօր նոր ընտրությունների մասին չի խոսվում, այլ՝ վարչապետի հրաժարականի։

Շարունակելով խոսքը՝ Լենա Նազարյանն ասաց, որ հայտարարության ստորագրման օրը Կառավարության շենք են մտել մի խումբ մարդիկ, որոնք ջարդ ու փշուր են արել Կաառավարության շենքը. «Անվտանգության աշխատակիցների հավաստմամբ, այդ մարդկանց շարքում էր նաև ԲՀԿ խմբակցության պատգամավորներից մեկը։ Ասե՞մ անունը՝ Դավիթ Մանուկյան»։

ԱԺ փոխխոսնակի այս հայտարարությանը դահլիճից արձագանքեցին ԲՀԿ-ական պատգամավորները։ Նրանցից յուրաքանչյուրն իր հերքումն էր ներկայացնում, արդյունքում՝ առաջացավ աղմուկ, և չհասկացվեց, թե կոնկրետ ինչ էին ասում ԲՀԿ-ական պատգամավորներրը։

Միյան լսելի էր, Իվետա Տոնոյանի խոսքը . «Տիկին Նազարյան, դուք այնտեղ էինք», որին արձագանքելով, Նազարյանը պնդեց. «Ոչ, այնտեղ չէի»։

Ապա, շարունակելով խոսքը, ԱԺ փոխխոսնակը նկատեց՝ Կառավարությունում  ջարդ ու փշուր կատարելու պայմաններում վարչապետի հրաժարական չի կարելի պահանջվել։

Ի պատասխան ԱԺ փոխխոսնակի հայտարարության, Նաիրա Զոհրաբյանը տեղից հայտարարեց ԲՀԿ-ական բոլոր պատգամավորների սենյակները ջարդված են, չի կարելի նման մանիպուլյացիաներ անել. «Չի կարելի, մենք եկել ենք, մարդկանց հանդարտության կոչ ենք արել։ Ասել ենք՝ չի կարելի, դուրս եկեք ԱԺ-ից, մի ջարդեք»։

Գևորգ Պետրոսյանն էլ տեղից հավելեց, որ Լենա Նազարյանի ասածը հանցագործության մասին հաղորդում է. «Իրավապահ մարմինները պարտավոր են լինել իրենց բարձրության վրա և հրավիրել Ձեզ՝ բացատրություն տալու»։

Լենա Նազարյանն էլ արձագանքեց՝ շատ լավ, թող այդպես էլ անեն իրավապահ մարմինները։

Թվում էր, թե այս  խոսակցությունից հետո պետք է նիստը շարունակվեր, բայց ԱԺ «Իմ քայլը» խմբակցության ղեկավար Լիլիթ Մակունցը վարման կարգով նշեց, որ նման բորբոքված մթնոլորտում հնարավոր չէ նիստը շարունակել, ուստի պետք է 20 րոպե ընդմիջում անել և հանդարտեցնել կրքերը։

Սակայն, ԲՀԿ-ական պատգամավոր Իվետա Տոնոյանը, վարման կարգով, հակադարձեց Մակունցին, նշելով, որ ընդմիջումը ոչ թե կրքերը հանդարտեցնելու, այլ իմքայլականներին «բերման ենթարկելու» և քվորում ապահովելու համար է.

«Դա պարզից էլ պարզ է։ Իսկ նյարդերի տեղի տալու մասին խոսելն ավելորդ է, քանի որ ձեր խմբակցությունը ներկայացնող ԱԺ փոխխոսնակը ակնհայտ ստահոդ տեղեկատվություն է տարածում, բնականաբար, շատ տրամաբանական է, որ խմբակցությունը, որին մեղադրանքի սլաքներն ուղղված են, արձագանքում է։ Առավել ևս, որ այդ բախումների օրը ձեր խմբակցությունից որևէ մեկը ներկա չի եղել ու չի փորձել հանդարտեցնել այն մարդկանց, որոնք գտնվել են թե՛ Կառավարությունում, թե՛ ԱԺ»-ում։

Մինչ Տոնոյանը խոսում էր, ԱԺ իմքայլական և ԲՀԿ-ական պատգամավորները, փոխադարձ մեղադրանքներ հնչեցնելով, մոտեցան իրար, սակայն գործը չհասավ բախումներին։

Լենա Նազարյանը հայտարարեց 20 րոպե ընդմիջում և  բոլորի կոչ արեց լքել նիստերի դահլիճը։