Ձեր վստահելի աղբյուրը

«Պետք է գիտակցել՝  Հայաստանի Հանրապետությունում նոր իրողություններ են, նոր իրավիճակ է, և քաղաքական համակարգը պետք է արտացոլի ներկայիս իրողություններն ու իրավիճակը»,-ԱԺ նիստի ընդմիջմանը լրագրողների հետ ճեպազրույցում հայտարարեց ԱԺ փոխնախագահ, ԲՀԿ-ական պատգամավոր Վահե Էնֆիաջյանը։

Նա ընդգծում է, առջևում բանակցություններ են, հետպատերազմական գործողություններ ու գործընթացներ են տեղի ունենալու, պետք է հասկանալ, որ ունենք անդառնալի կորուստներ, նաև հասկանանք, որ քաղաքական լուծումներով պետք է իրավիճակ փոխել։

«Առհասարակ համաշխարհային պրակտիկան է ցույց տալիս, որ պարտված  կառավարությունը, պատասխանատուները չեն կարող շարունակել իրենց գործողություններն ու գործունեությունը։ Մենք գտնում ենք, որ նոր մարդիկ նոր սկզբունքներով, մոտեցումներով պետք է կարողանան բեկում մտցնել դիվանագիտական հարթակում, և ստեղծված ռիսկերը փոխել»,-ասաց ԱԺ փոխնախագահը։

Ի պատասխան հնչած հարցին, Էնֆիաջյանը տեղեկացրեց, Հանրապետության նախագահի հետ հանդիպում չի ունեցել, սակայն Հայաստանում գործող քաղաքական ուժերի, նաև ՀՀ նախագահի կողմից հստակ մատնանշվել է ստեղծված իրավիճակը։

Ո՞ւմ է տեսնում բանակցողի կարգավիճակում օրենսդիր մարմնի ներկայացուցիչը։ Հարցին ԲՀԿ-ականի պատասխանը հստակ է՝ պաշտոնի ու աթոռի, կարգավիճակ զբաղեցնելու կռիվ չէ, այն անձը կամ անձինք, որոնք պետք է պատասխանատվություն վերցնեն, պետք է գիտակցեն, որ նրանց համար չափազանց վատ մեկնարկի հնարավորություն է ստեղծված։

«Բայց վիճակը անելանելի չէ, պետք է փոփոխությունները տեղի ունենան»,-ասաց նա՝ հարցերին ի պատասխան ավելացնելով, որ ԲՀԿ քաղաքական թիմը երբեք պատասխանատվությունից չեն խուսափել ու չեն խուսափում։

Նա ընդգծում է, պետք է հստակ հասկանալ, որ խնդիրը մեկ կամ երկու քաղաքական ուժերի, խորհրդարանական կամ արտախորհրդարանական ուժերի հարց չէ, այս իրավիճակի սպառողը ՀՀ քաղաքացին է։

«Բանակցային գործընթացում նոր մարդիկ պետք  է լինեն, որոնք ի վիճակի են բեկում մտցնել, մարդիկ, որոնք արտաքին աշխարհում, դիվանագիտական հարթակում կարող են Հայաստանի շահերը, ՀՀ քաղաքացու շահերը լավագույնս ներկայացնել»,-ասաց նա։

Հիշեցնենք, որ ՀՀ նախագահ Արմեն Սարգսյանը երեկվա իր ուղերձում մասնավորապես նշել է.

«Հաշվի առնելով ստեղծված իրավիճակը և այն արժանապատվորեն հաղթահարելու հրամայականը, ականջալուր լինելով հանրային պահանջին, ակնհայտ է, որ երկիրը ցնցումներից զերծ պահելու համար ի վերջո անխուսափելի են լինելու Ազգային ժողովի արտահերթ ընտրությունները:

Այս համատեքստում, իմ կարծիքով, միակ պատասխանատու մոտեցումը կարող է լինել կառավարության և իշխող քաղաքական ուժի կողմից սեփական ներուժի օբյեկտիվ գնահատելը և սեղմ ժամկետում ճանապարհային քարտեզ ներկայացնելը, որով կնախատեսվեն համապատասխան սահմանադրական գործընթացների նախաձեռնման ժամկետները, որոնց արդյունքում հնարավոր կդառնա իրականացնել Ազգային ժողովի արտահերթ ընտրություններ, իսկ մինչ այդ կառավարումը կհանձնվի բարձր որակավորում ունեցող Ազգային համաձայնության կառավարությանը:

Հայաստանի Հանրապետության, Արցախի Հանրապետության ու աշխարհի տարբեր երկրներում բնակվող ողջ հայ ժողովրդի համար այս դժվարին օրերին ճգնաժամը հաղթահարելուն ուղղված իմ վերոնշյալ դիտարկումները բխում են բացառապես համապետական և համազգային շահերից»։