Ձեր վստահելի աղբյուրը

«Նիկոլ Փաշինյանը ուզում է Հայաստանի պատմության մեջ մնալ միակ ղեկավարը, ով ստորագրելով Արցախը  հանձնելու, Արցախը թուրքի առաջ ծնկի բերելու կապիտուլյացիոն համաձայնագիրը, շարունակի ամեն գնով  պաշտպանել իշխանությունը»,- Ազգային ժողովում լրագրողների հետ ճեպազրույցում ասաց ԱԺ ԲՀԿ խմբակցության անդամ Նաիրա Զոհրաբյանը։

Նրա խոսքով, իրենց փորձում են մեղադրել՝ իշխանություն ենք  ուզում. «Դա սուտ է, ապատեղեկատվություն է, որևէ քաղաքական ուժ, որն այսօր հասկանում է, թե ինչ ծանր բեռ է ժառանգելու Նիկոլ Փաշինյանի ավիրածություններից հետո, չի ուզում իշխանությունը։ Բայց Նիկոլ Փաշինյանը պետք է հեռանա։ Չի կարող։ Սա իրենց ֆեյքերը չեն, որ  պատմության դասագրքերից հանեցին  եկեղեցին, հայ գրականությունը, Հայոց ցեղասպանության  ցուցատախտակից հանեցին «պահանջում ենք»-ը ու որոշ պատգամավորներ,  սորոսական ՀԿ-ների ներկայացուցիչները հպարտ նկարվում էին միայն «հիշում ենք» ցուցապաստառի տակ»։

«Զարհուրելի է, երբ մարդիկ փորձում են կյանքի գնով պահել իշխանություն։  Այս երկրում կա մեկ  մարդ, որը ուզում է լինել բացառություն և անգամ այս խայտառակ կապիտուլյացիայից հետո  պահել իշխանությունը»,- ասաց Ն. Զոհրաբյանը։

Նա նշեց, որ Նիկոլ Փաշինյանի անունն  այլևս գրվել է պատմության մեջ Գետադարձի, Մելիք Ֆրանգյուլի անվան կողքը։

ԲՀԿ-ական պատգամավորն ասաց, որ մեկ լավ լուրի ունի. «Հիշում եք՝ իմ էջում տեղադրել էի 4 օլիգարխների անունները, ովքեր ֆինանսավորում են խայտառակ ֆեյք ինդուստրիան, որոնցից մեկը կորդինացվել է ԱԺ փոխնախագահ Ալեն Սիմոնյանի կողմից։
Ասեմ, որ այդ օլիգարխներից երկուսը հրաժարվել են, փակել են իրենց ֆեյք ինդուստրիաները, բայց դա նրանց չի ազատելու պատասխանատվությունից։

Այդ մարդիկ 2,5 տարի ֆինանսավորել են թշնամանք, ատելություն, ընտանիքներում հորը որդու դեմ հանել, նրանք բոլորը պետք է տան պատասխան»,- ասաց Ն. Զոհրաբյանը։

Նա ընդգծեց, որ ԱԺ դահլիճում պետք է քննարկվի միայն մեկ օրակարագ՝ Նիկոլ Փաշինյանի հրաժարականը։

Դիտարկմանը, որ Նիկոլ Փաշինյանն ասել է՝ իր օրակարգում նման հարց չկա, Ն. Զոհրաբյանն ասաց. «Նիկոլ Փաշինյանին շատ բան կարող է ասել։ Ճանաչելով Նիկոլ Փաշինյանին՝ վստահ եմ, որ դա ասում է  անկեղծ։  Այո, Նիկոլ Փաշինյանի օրակարգում չկա, բայց նա այլևս ունակ չէ որևէ օրակարգ որոշելու։ Նիկոլ Փաշինյանը պետք է հեռանա, մենք ամեն ինչ անելու ենք»։

Ինչ վերաբերում է ՀՀ նախագահի երեկվա կոչին, մասնավորապես՝ «ակնհայտ է, որ երկիրը ցնցումներից զերծ պահելու համար ի վերջո անխուսափելի են լինելու Ազգային ժողովի արտահերթ ընտրությունները», նա նշեց, որ իշխանության ֆեյքերն անասելի գրոհ են սկսել նրա դեմ։