Ձեր վստահելի աղբյուրը

«Ինչքան պետք է, որքան պետք է..., 1000 անգամ մտքեր ենք արտահայտելու, մինչև հասկանաք մի պարզ բան, որ այն, ինչ այս տրիբունայից խոսվում է, անհեթեթ է»,- խորհրդարանում ասաց ԱԺ «Բարգավաճ Հայաստան» խմբակցության պատգամավոր Արման Աբովյանը՝ անդրադառնալով իշխանական խմբակցության պատգամավորների հայտարարություններին։

Ըստ պատգամավորի, իմքայլականներն ատելությունից են խոսում. «Տիկի՛ն Նազարյան, այդ վիդեոն, որ մի տասը րոպե առաջ հրապարակել եք, ուշադիր նայել եք, չէ՞։ Շատ ուշադիր եք։ Մեջը ի՞նչ եք տեսնում»։

Մինչ Աբովյանը դիմում էր Լենա Նազարյանին, դահլիճից նույն տեսանյութի հետ կապված միտք հայտնեց նաև ԲՀԿ-ական պատգամավոր Նաիրա Զոհրաբյանը, սակայն Արման Աբովյանը հորդորեց. «Մի րոպե, տիկին Զոհրաբյան», ապա շարունակեց խոսքը, նշելով, որ այդ տեսանյութում ԲՀԿ-ական պատգամավորներն իրեց անվտանգությունն անտեսելով, պետական կառույցներ էին պաշտպանում, երբ իշխանական պատգամավորներն ուղղակի անհետացել էին։

«Էդ եք դուք տեսնում»,- շեշտեց Արման Աբովյանը

Իմքայլական պատգամավորներից մեկն էլ տեղից հարց հնչեցրեց՝ ումի՞ց էիք պաշտպանում։

«Չգիտեմ՝ ումից, բայց ես շատ հետաքրքիր հարց ունեմ՝ էդ ինչի՞ համար իմ առանձնասենյակից նոթբուք կորավ։ Ոչ թե նոթբուքի դարդն եմ անում, այլ հարցնում՝ ինչու հենց նոթբուքը կորավ։ Շատ հնարավոր է, որ այդ ամեն ինչը ուղղորդված է եղել, որ այդ մարդկանց ջարդարար ու եսիմ ինչ հանեն»,- արձագանքեց Արման Աբովյանը։

Բացի այդ, ըստ ընդդիմադիր պատգամավորի, Լենա Նազարյանը տեսանյութեր է հրապարակում՝ ամենալկտի հայհոյանքներով ու սպառնալիքներով.

«Մեզ սպառնո՞ւմ եք, ինչի՞ համար, որ ասում ենք՝ չի կարելի Ղարաբաղը հանձնել, հա՞։ Դրա համա՞ր եք մեզ, մեր ընտանիքներին ու երեխաներին սպառնում։ Ժողովուրդ, դուք էսօր ստեղ ի՞նչ եք քննարկում, դուք հասկանո՞ւմ եք ազգային աղետի մակարդակը։ Մեզ էլ ասում եք, թե իբր հազար անգամ կրկնում ենք, տասը հազար անգամ կկրկնենք։ Ի վերջո հասկացեք, որ հետագա բոլոր գործողությունները, որ պետք է լինեն, դուք ունակ չեք տանելու, վերջ։ Ունեիք ժամանակ, հարցնում էինք՝ ինչ եք քննարկում, մեր վրա մատ էիք թափ տալիս։ Տեսանք։

Սաղիս վրա գործեր եք բացել. Ծառուկյանն օրը երկու անգամ ԱԱԾ ու քննչական է գնում, հետապնդումն էլ ո՞նց է լինում՝ պոզով-պոչո՞վ։ Երեկ մամուլը գրում էր նաև, որ արդեն իսկ դանակահարվել է ձեր ընդդիմախոսներից մեկը։ Հիմա ո՞վ է գեներացնում ատելություն։ Տիկին Նազարյան, ո՞վ է գեներացնում, Ձեր դրած վիդեոները բացեք նայեք։ Թե՞ կարող է Ձեր հեռախոսը գողացել են։ Մի հատ բացեք, նայեք։ Ժողովուրդ, էլի եմ կրկնում, դուք հիմա չեք հասկանում, որ իրավիճակ է փոխվել։ Ու երկրի ապագան կախված է ձեր հստակ քայլերից, գնացեք»։