Ձեր վստահելի աղբյուրը

Շուշին հանձնելու հարցը չի եղել մինչև վերջերս տեղի ունեցած հակամարտությունը։ Այս մասին ասել է ՌԴ նախագահ Վլադիմիր Պուտինը, փոխանցում է «ՌԻԱ Նովոստի»-ն։

Նա նաև հայտնել է, որ հոկտեմբերին ինքը համոզել է Ալիևին դադարեցնել մարտերը Լեռնային Ղարաբաղում՝ պայմանով, որ փախստականները վերադառնան Շուշի, բայց Հայաստանը դեմ է եղել դրան:

Միևնույն ժամանակ, ՌԴ նախագահը մատնանշել է փախստականներին Արցախ վերադարձնելու առաքելության կարևորությունը։ 

«Սա շատ կարևոր և զգայուն խնդիր է: Այս մարդկանց անվտանգությունն ապահովելու նպատակով է տեղակայվում  ռուսական խաղաղապահ զորախումբը։ Այս առաքելությունը վստահված է ռուս խաղաղապահներին»,- շեշտել է նա։

Պուտինը գնահատել է նաև Թուրքիայի գործողությունները Արցախի հետ կապված իրավիճակում։

«Դուք կարող եք ցանկացած գնահատական տալ Թուրքիային՝ կապված ԼՂ հարցի հետ,  բայց նրան չի կարելի մեղադրել միջազգային իրավունքի խախտման մեջ։ Ի դեպ, Թուրքիան ի սկզբանե ղարաբաղյան կարգավորման հարցով ԵԱՀԿ Մինսկի խմբի անդամ էր: Այսպիսով, դա միջազգային ինստիտուտի, կարգավորման միջազգային մեխանիզմի շրջանակում էր։ Թուրքիան համանախագահ երկիր չէ, Ֆրանսիան, Ռուսաստանը և ԱՄՆ-ն են համանախագահները, բայց, այնուամենայնիվ, Թուրքիան այս խմբի մաս է կազմում»,- ասել է նա:

Խոսելով Ադրբեջանին ցուցաբերված թուրքական աջակցության մասին՝  Պուտինը նաև ասել է. «Թուրքիան երբեք չի թաքցրել, որ աջակցում է Ադրբեջանին Ղարաբաղի հարցում, դա ԽՍՀՄ փլուզման աշխարհաքաղաքական հետևանքներն են»:

Իսկ թե ինչու ՀԱՊԿ-ը չի միջամտել ղարաբաղյան հակամարտությանը, Պուտինը բացատրել է հանգամանքով, որ միջազգային իրավունքի համաձայն Ղարաբաղը միշտ եղել է Ադրբեջանի անբաժանելի մասը, ՀԱՊԿ-ը չէր կարող միջամտել, քանի որ Հայաստանի վրա ոչ ոք չի հարձակվել։

Ապա, շարունակելով խոսքը, Պուտինը նշել է, որ Ղարաբաղի վերջնական կարգավիճակը դեռ կարգավորված չէ։

«Ինչ է լինելու հետագայում, կլինի ապագայում, կորոշեն ապագա ղեկավարները, այս գործընթացի ապագա մասնակիցները: Բայց, իմ կարծիքով, եթե պայմաններ ստեղծվեն բնականոն կյանքի համար, Հայաստանի և Ադրբեջանի միջև հարաբերությունների վերականգնման համար՝ հատկապես հակամարտության գոտում, դա պայմաններ կստեղծի Ղարաբաղի կարգավիճակի որոշման համար», - հավելել է ՌԴ նախագահը: