Ձեր վստահելի աղբյուրը

«ԱրմՆյուզ» հեռուստաընկերության «Օրախնդիր» հաղորդաշարի ժամանակ «Սիսական» ջոկատի հրամանատար, «Մարտական խաչ» 2-րդ աստիճանի շքանշանակիր Աշոտ Մինասյանը հայտարարեց, որ լինելով զինվորական, տիրապետելով գաղտնալսման բոլոր կանոններին և պաշտոնի բերումով բազմաթիվ գաղտնալսումներ իրականացնելով, չէր կարող բաց կապով Նիկոլ Փաշինյանի մահափորձի հարցը քննարկել:

Նա կարծիք հայտնեց, որ իր տարբեր ժամանակների խոսակցությունները մոնտաժել, բառերը համադրել և սարքել էին ձայնային շոու:

«Ես մարդասպան չեմ, չնայած շատ թուրք եմ սպանել, բայց հայասպան չեմ»,- հայտարարեց Աշոտ Մինասյանը:

Անդրադառնալով արցախյան պատերազմի ընթացքին՝ «Սիսական» ջոկատի հրամանատարը հայտնեց, որ երբ հանձնված չէին Ջեբրայիլը, Կուբաթլուն, Զանգելանը, այդ ժամանակ արդեն թիկունքում վայ ղեկավարների և հրամանատարների միջոցով  խուճապ էր տարածվում:

Վերջինս նաև զարմանք հայտնեց, որ արցախյան առաջին պատերազմում հաղթանակ տարած գեներալները և հրամանատարները մեկուսացված են եղել ռազմական գործողություններից, որի մեջ միտում է տեսնում: Ըստ Մինասյանի, ինչպես հասարակությանը մասնատեցին սևերի և սպիտակների, այդ ձևով էլ մասնատեցին բանակը:

Աշոտ Մինասյանի խոսքով, այս իշխանություններով և ԱԺ-ով, Հայաստանը ունակ չէ պայքարելու նաև հաջորդ պատերազմներում: Նա հայտարարեց, որ կմասնակցի նաև 4-րդ պատերազմին, բայց ոչ այս իշխանությունների հետ:

«Մեր երկրին պետք է նոր ղեկավար, որն ունակ կլինի ղեկավարելու, ճիշտ բանակցություններ վարելու երկու բարեկամ երկրների՝ Ռուսաստանի և Իրանի հետ: Բայց այն դեպքում, երբ մարդը պատրաստակամ չէ աշխարհի հզոր այս երկու պետությունների բարեկամական կապերը պահելու, մենք ունակ չենք լինի ոչ մի պատերազմի, կդառնանք, այսպես ասած, Թուրքիայի վիլայաթներից մեկը»,- հայտարարեց Աշոտ Մինասյանը:

Նրա խոսքով, Հայաստանի ռազմական պարտությունը եկել է քաղաքական պարտությունից:

«Ինձ հետաքրքիր է Աննա Հակոբյանն արդեն դիրքերից իջե՞լ է, կամ Աշոտը Փաշինյա՞ն,  թե՞ որոշել են Քյոխի նման մնալ ու զոհվել այնտեղ»,- հռետորական հարց հնչեցրեց Աշոտ Մինասյանը՝ անդրադառնալով պատերազմի իրական պատկերը աղճատելու իշխանությունների քայլերին: