Ձեր վստահելի աղբյուրը

Թուրքիայի հռետորաբանությունը Կիպրոսի նկատմամբ և Միջերկրական ծովի արևելյան մասում նրա վարքագիծն ընդլայնում է նրա բաժանումը Եվրամիությունից, և երկու երկրների հարաբերություններն արագ շրջադարձային փուլի են մոտենում։ Այս մասին նախօրեին, ahval-ի փոխանցմամբ, ԵՄ արտաքին գործերի նախարարների հանդիպումից հետո լրագրողներին ասել է ԵՄ արտաքին քաղաքականության ղեկավար Ժոզեպ Բորելը:

«Ժամանակը վերջանում է, և մենք Թուրքիայի հետ մեր հարաբերությունների ջրբաժանի պահին ենք մոտենում։ Թուրքական կողմը պետք է ցույց տա վերաբերմունքի հիմնարար փոփոխություն, որպեսզի վերադառնանք դրական օրակարգի», - ասել է Բորելը:

Դեկտեմբերի 10-ին նախատեսված ԵՄ առաջնորդների գագաթնաժողովը որոշելու է, թե որ ուղղությամբ են ընթանում հարաբերությունները, ասել է Բորելը:

Գագաթնաժողովում առաջնորդները կքննարկեն Թուրքիայի դեմ պատժամիջոցներ կիրառելու հարցը՝ Միջերկրական ծովի արևելքում իր հորատման գործողությունների համար, որը միջազգայնորեն ճանաչվում են Հունաստանի և Կիպրոսի տարածքային ջրեր:

Հունաստանը և Կիպրոսը կողմ են պատժամիջոցներին, սակայն Գերմանիան ցանկանում է մեկ այլ հնարավորություն տալ երկխոսությանը՝ ԵՄ-ի և Թուրքիայի սերտ առևտրային կապերի պատճառով:

Հիշեցնենք, որ օրերս Թուրքիայի նախագահ Ռեջեփ Թայիփ Էրդողանը հայտարարեց, որ  Կիպրոսի հարցը պետք է լուծվի երկու պետություն սկզբունքով։

Կիպրոսը բաժանվել է այն բանից հետո, երբ Թուրքիան ներխուժեց կղզու հյուսիսային մասը 1974 թվականին՝ ի պատասխան հեղաշրջման, որը փորձում էր կղզին Հունաստանին միացնել:

Կիպրոսի Հանրապետությունը, որը միջազգայնորեն ճանաչված միակ պետությունն է և Եվրամիության անդամ է, իր լիազորություններն իրականացնում է ՄԱԿ-ի կողմից վերահսկվող բուֆերային գոտու հարավում գտնվող կղզու երկու երրորդի նկատմամբ:

Ինքնահռչակ Հյուսիսային Կիպրոսի Թուրքական Հանրապետությունը (ՀԿԹՀ), որը միջազգային ճանաչում է ստացել միայն Անկարայի կողմից, վերահսկում է կղզու հյուսիսային մասը, որտեղ տեղակայված են շուրջ 30,000 թուրք զինվորներ: